तितोपाटी- मानव तस्करले १ सय ६१ जना महिलालाई वैदेशिक रोजगारीका लागि श्रीलंकाहुँदै कुवेत पुर्याएका छन् । श्रीलंकाको विमानस्थल कोलम्बो हुँदै ती महिलालाई कुवेत पुर्याएको सूचना आएको कुवेतस्थित नेपाली दूतावासले जानकारी दिएको छ ।
श्रीलंकाहुँदै कुवेत पुगेका ती महिला भारतको रुट भएर तस्करमार्फत कुवेत भित्रिएको दूतावासले जनाएको छ । श्रीलंका हुँदै नेपाली महिला कसरी कुवेत आइपुगे भनेर अध्ययन भइरहेको र परराष्ट्र मन्त्रालयमार्फत सम्बन्धित निकायलाई जानकारी गराइएको दूतावास स्रोतले बताएकाे छ ।
सरकारले नेपालबाट भिजिट भिसा र व्यक्तिगत श्रम स्वीकृति महिला कामदारका हकमा कडाइ गर्न थालेपछि भारतहुँदै नेपालीलाई घरेलु रोजगारीका लागि खाडीका देश र मलेसिया पुर्याउन थालिएको छ ।
पछिल्लो समय वैदेशिक रोजगारीका नाममा महिलासँगै पुरुष कामदारकाे पनि तस्करी भइरहेको छ । तस्करहरूले वैदेशिक रोजगारीको प्रलोभन देखाएर पैसा असुली विभिन्न देश पुर्याएर अलपत्र पार्ने गरेकाे वैदेशिक रोजगार विभागका महानिर्देशक कुमार दहालले बताए ।
विभागले दिउँसो मात्र होइन, रातिसमेत रोजगारीका नाममा भइरहेको मानव तस्करी नियन्त्रण गर्न प्रयास गरिरहेको महानिर्देशक दहाल बताउँछन् । उनी भन्छन्, ‘वैदेशिक रोजगारीका नाममा मानव तस्करी बढिरहेको छ । यसलाई नियन्त्रण र रोक्न प्रयास भइरहेको छ ।’
२०७२ साल चैतदेखि सरकारले खाडीका ६ देश र मलेसियामा घरेलु काममा जाने कामदारलाई श्रम स्वीकृति जारी नै गरेको छैन । घरेलु कामदारका रूपमा वैदेशिक रोजगारीमा जान सरकारले प्रतिबन्ध लगाएको छ । तर, घरेलु रोजगारीका लागि नेपाली महिला कामदार तेस्रो देश र व्यक्तिगत श्रम स्वीकृतिमा मानव तस्करले ओसार्ने काम गरिरहेका छन् ।
वैधानिक रूपमा विदेश जाने बाटो बन्द भएपछि अवैधानिक रूपमा तेस्रो मुलुकको बाटो हुँदै खाडीलगायतका मुलुकमा जाने महिलाको संख्या बढ्दै गएको छ । –साभार शिलापत्रबाट
