सुशिल बस्याल “राष्ट्रप्रेमी” कास्की । लिडरसिप एकेडेमी नेपाल द्वारा आयोजित दुईदिने अभिमुखीकरण तथा क्षमता विकास कार्यक्रम पोखरामा सम्पन्न भएको छ । देशका विभिन्न जिल्लाबाट विभिन्न गैरसरकारी संस्थाका करिब ३५ जना प्रतिनिधिहरूको सहभागितामा कार्यक्रम सञ्चालन गरिएको थियो । सामाजिक नेतृत्व, संस्थागत सुदृढीकरण, समुदायसँगको सहकार्य तथा युवाको सक्रिय भूमिकालाई केन्द्रमा राखेर कार्यक्रम आयोजना गरिएको आयोजकले जनाएको छ ।
तालिममा नेतृत्व विकास, प्रभावकारी सञ्चार, सामाजिक अभियान सञ्चालन, संस्थागत क्षमता अभिवृद्धि तथा समुदायमा सकारात्मक प्रभाव सिर्जना गर्ने विषयमा सहजीकरण गरिएको थियो । सहभागीहरूले आफ्ना जिल्लामा भइरहेका सामाजिक अभ्यास, चुनौती तथा सम्भावनाबारे अनुभव आदानप्रदान गरेका थिए ।
कार्यक्रमका प्रमुख सञ्चालन अधिकृत जयेन्द्र रिमालले व्यवहारिक नेतृत्व बिना समाज परिवर्तन सम्भव नहुने बताउनुभयो । उहाँले समुदायको आवश्यकता बुझेर जिम्मेवार ढंगले काम गर्नुपर्ने कुरामा जोड दिनुभयो ।
वरिष्ठ कार्यक्रम प्रबन्धक प्रभाकर प्रधानले गैरसरकारी संस्थाहरूले पारदर्शिता, उत्तरदायित्व र दीर्घकालीन प्रभावलाई प्राथमिकता दिनुपर्ने बताउनुभयो । त्यस्तै कार्यक्रम प्रबन्धक प्रज्ञा घिमिरेले नेतृत्व विकासलाई निरन्तर सिकाइ र आत्मविश्वासको प्रक्रिया भएको उल्लेख गर्नुभयो ।
समापन समारोहलाई सम्बोधन गर्दै गण्डकी प्रदेश सरकारका भौतिक पूर्वाधार विकास तथा यातायात व्यवस्था मन्त्रालयका माननीय मन्त्री गोबिन्द बहादुर नेपालीले यस्ता कार्यक्रमले समाजमा सकारात्मक परिवर्तनको आधार तयार गर्ने बताउनुभयो ।
कार्यक्रममा सहभागी सुशि बस्याल ‘राष्ट्रप्रेमी’ ले तालिमलाई अत्यन्त उपयोगी, ज्ञानवर्द्धक र प्रेरणादायी भएको उल्लेख गर्नुभयो । उहाँले प्राप्त ज्ञानलाई आफ्नो समुदायमा प्रयोग गर्दै सामाजिक परिवर्तनमा योगदान दिने प्रतिबद्धता व्यक्त गर्नुभयो ।
कार्यक्रममा सहभागीहरूले तालिमबाट प्राप्त ज्ञान, सीप र अनुभवलाई व्यवहारमा उतार्दै समुदायमा सकारात्मक परिवर्तन ल्याउने संकल्प व्यक्त गरेका थिए । आयोजक संस्था लिडरसिप एकेडेमी नेपाल लामो समयदेखि सामाजिक तथा नेतृत्व विकासका क्षेत्रमा सक्रिय रूपमा कार्य गर्दै आएको छ ।
