तितोपाटी – सन २०२२ मा कतारमा आयोजना हुने विश्वकप फुटबल छनोट चरणको खेलको लागि नेपालको राष्ट्रिय फुटबल टिम र पदाधिकारी सहित ३५ जनाको टोली कुवेत आइपुगेका छन् । फ्लाइ दुबइको उडानबाट आज दिउँसो कुवेत आइपुगेका नेपाली राष्ट्रिय फुटबल टोलीलार्इ स्वागत गर्न नेपाली राजदूतावास कुवेतका महामहिम राजदूत दुर्गा प्रसाद भण्डारी सहितको दूतावासको टोली, गैरअावासीय नेपाली संघ राष्ट्रय समन्वय परिषद कुवेतको प्रतिनीधि मण्डल सहित कुवेतमा संघ-सँस्था, समाजसेवी, वुद्धिजीवि, पत्रकार, खेलाडी, कलाकार लगायत कुवेतमा कार्यरत नेपाली खेल प्रेमी नेपाली दाजुभाइ तथा दिदीबहिनीहरू कुवेतस्थित सेख साद विमानस्थलमा स्वागत गर्न पुगेका थिए भने राष्ट्रिय खेलाडीहरूको टोलीलाइ पुष्पगुच्छा र खादाले भब्य स्वागत गरिएको थियो ।
नेपाली टिमले आगामी सेप्टेम्बर ५ तारिकको दिन कुवेतको कैफान स्थित स्पोर्टिङ क्लवमा साँझ ७ः४५ बजे कुवेतसँग खेल्ने भएको छ । नेपालले विश्वकप छनौट खेल अन्तर्गत कुवेत, जोर्डन, ताइवान लगायतका मुलुकसँग फुटबल खेल खेल्नेछ र छनोट चरणमा विजयी भएमा सन २०२२ मा कतारमा आयोजना हुने विश्वकप फुटबल प्रतियोगितामा सहभागिता जनाउन पाउनेछ ।
