पानी सारा पखाल्यो सडक सडकमा पौरखी भावनाले
खोलानाला बढायो बखत बखतमा शुध्दता कामनाले
तिर्खा लाग्दा पिलायो कलकल तसरी प्यारको भावनाले
पाखाबारी रसायो प्रकृति प्रगतिको शान्तिको साधनाले ।१।🌷🙏🌺
पानी जस्तो बनेमा प्रियजन सबको प्यारले शान्ति ल्यायो
आशावादी भएमा दिनदिन जनको साथले कान्ति छायो
कोरोनाले पुर्यायो शहर कहरमा लोकमा भ्रान्ति ल्यायो
पाखण्डीले सतायो कुकृति विकृतिले चोकमा क्रान्ति ल्यायो ।२।🌷🙏🌺
खोल्साखोल्सी लुकेका असुर कपटका उद्यमी साधनामा
बाटाघाटा ढुकेका कपुत कलहका पारखी दुष्टतामा
सारै सस्तो बनाए अपयस जगमा तुच्छ्ता उच्चतामा
गुण्डा जस्तो लुकाए छल बल मनमा ताडना सत्यतामा ।३।🌷🙏🌺
आगो बाल्दै जलाए हतपत त्यसरी लेखनी पुस्तिकामा
कुत्ता बिल्ली बनेका सपुत कपुतको भूमिका पालनामा
राम्रो मात्रै गरौँला अनुसरण भनी भन्दछिन् भावनाले
पूजा गर्दा खुशी भै सबल सफलता बाँड्दछिन् साधनाले ।४।🌷🙏🌺
टुक्राटाक्री जुटाए हरबखत जुटी पौरखी साधनाले
टुक्क्रा पारी फुटाए झटपट पदको लोभको भावनाले
हामी सारा जुटेमा भरसक गतिलो मान्दछिन् एकताले
पानी जस्तै बनेमा अकपट रसिलो मान्दछिन् मान्यताले ।५।🌷🙏🌺
-हरि शर्मा (गलकोटे कवि)
मिशिगन, अमेरिका ।🌷🙏🌺
