कुवेतस्थित नेपाली राजदूतावासले विगतका वर्षहरूमा मृत्यु वा घाइते भएका नेपाली नागरिकहरूको क्षतिपूर्ति प्राप्त गराउन कानूनी प्रक्रियामार्फत आवश्यक पहल गरेको जनाएको छ।
राजदूतावासद्वारा जारी प्रेस विज्ञप्तिअनुसार, निरन्तर प्रयासको परिणामस्वरूप आर्थिक वर्ष २०८२/०८३ मा क्षतिपूर्ति बापतको बीमा रकम, बाँकी तलब, सेवासुविधा रकम तथा सम्बन्धित कम्पनीहरूबाट प्राप्त सहयोग र मानवीय सहायता रकम गरी कुल ३,०७,१४६.३१७ कुवेती दिनार (करिब नेपाली रु. १४ करोड ५० लाख) प्राप्त भएको छ।
उक्त रकम सम्बन्धित मृतक तथा घाइते नेपाली नागरिकका कानूनी हकदारहरूले प्राप्त गर्ने व्यवस्था मिलाउन राजदूतावासले विभिन्न समयमा नेपाल सरकार अन्तर्गतको परराष्ट्र मन्त्रालय, कन्सुलर सेवा विभागमा पठाइसकेको जनाएको छ।
राजदूतावासले यस कार्यलाई प्रवासी नेपाली कामदार तथा उनीहरूका परिवारको हकहित संरक्षणका लागि महत्वपूर्ण उपलब्धि भएको उल्लेख गरेको छ ।
