Saturday 21st November 2026

नेपाल पत्रकार महासंघ कुवेतको १७औं स्थापना दिवसमा रक्तदान कार्यक्रम सम्पन्न


नेपाल पत्रकार महासंघ वैदेशिक शाखा कुवेतले आफ्नो १७औं स्थापना दिवसको अवसरमा आयोजना गरेको रक्तदान कार्यक्रम भव्य र उत्साहपूर्ण रूपमा सम्पन्न गरेको छ। “रक्तदान जीवनदान” भन्ने नारासहित कुवेतको सेन्ट्रल ब्लड बैंक (जाब्रिया) मा आयोजित कार्यक्रममा कुवेतका लागि नेपाली राजदूत घनश्याम लम्सालले रक्तदान गरी कार्यक्रमको उद्घाटन गर्नुभएको थियो। उक्त अबसरमा जम्मा १०२ जना रक्तदाताले स्वास्फुर्त रूपमा रक्तदान गरेका थिए ।

कार्यक्रममा नेपाली दूतावास कुवेतका काउन्सिलर सुजनी राना, द्वितीय सचिव तथा सूचना अधिकारी शिव बानियाँ, नेपाल पत्रकार महासंघका पूर्व महासचिव रोशन पुरी, महासंघ वैदेशिक शाखा यूएईका अध्यक्ष मेघराज सापकोटा, एनआरएनए कुवेतका अध्यक्षद्वय दिलकुमार पाख्रिन र विकास सिंह ठकुरी लगायत विभिन्न संघसंस्था, सञ्चारकर्मी तथा नेपाली समुदायका सदस्यहरूको उल्लेखनीय सहभागिता रहेको थियो।

स्थापना दिवसको अवसरमा महासंघले यस वर्ष तेस्रो रक्तदान कार्यक्रम र चौथो माधव शाही स्मृति पत्रकारिता पुरस्कार वितरण समारोह आयोजना गरेको हो। विगतमा महासंघले ‘विदेश विमर्श’ तथा श्रमिक सचेतनासम्बन्धी कार्यक्रमहरू सञ्चालन गर्दै आएको थियो।

कार्यक्रममा बोल्दै राजदूत लम्साल तथा अन्य अतिथिहरूले प्रवासमा रहेर निष्पक्ष, जिम्मेवार र सत्यतथ्य पत्रकारितामार्फत नेपाली समुदायको आवाज उठाउन महासंघले खेलेको भूमिकाको प्रशंसा गरेका थिए। साथै, रक्तदानजस्ता मानवीय अभियानले सामाजिक एकता र सेवाभावलाई थप मजबुत बनाउने विश्वास व्यक्त गरेका थिए।

कार्यक्रम संयोजक दीपेन्द्र निरौलाले सहभागी, रक्तदाता तथा सहयोगी सबैप्रति आभार व्यक्त गरेको उक्त कार्यक्रममा अल मुजैनी एक्सचेन्ज मुख्य प्रायोजक रहेको थियो भने डीबी कलेक्सन, डाम्पा चौतारी, रोयल गाउँले लगायतका संस्थाहरूले सहयोग गरेका थिए। समापनका अवसरमा शाखाका अध्यक्ष एकराज मल्लले सम्पूर्ण सहयोगी संस्था, दूतावास, सञ्चारकर्मी तथा सहभागीहरूलाई धन्यवाद ज्ञापन गरेका थिए ।


सम्बन्धित शीर्षकहरु

म्यानमारको सेनाले रोहिंग्या मुस्लिम समुदायमाथि सन् २०१७ मा गरेको सैन्य दमनलाई नरसंहार ठहर गर्दै अन्तर्राष्ट्रिय न्यायालय (आईसीजे) ले ऐतिहासिक फैसला…

काभ्रे, मंसिर ३। काभ्रे जिल्लाको एक रिसोर्टबाट ३५ जापानीसहित ४० जना विदेशी नागरिकलाई प्रहरीले नियन्त्रणमा लिएको छ। दुई दिनभित्र काभ्रेका…

ढाका, नोभेम्बर १९। बंगलादेशमा पूर्वप्रधानमन्त्री शेख हसिनाको स्वदेश फिर्तीको विषयलाई लिएर राजनीतिक तनाव चुलिएको छ। हसिनाको पार्टी अवामी लिगका समर्थकहरू…

प्रतिकृयाहरू
...