अस्तित्व आफ्नो उसले चितायो
आमोद आफ्नै घरमा बसायो
साथित्व तोड्यो उसले फसायो
आक्रोश पोख्यो अरुको बितायो ।१।🌷🙏🌺
आचार यस्तो उसले सिकायो
व्यक्तित्व उस्तै दलमा घुसायो
भ्रातृत्व मार्यो छलको पुजारी
मातृत्व घाती घरको शिकारी ।२।🌷🙏🌺
पाण्डित्य,छाँट्यो शुरुमा अचाक्ली
सर्वस्व गुम्दा जनता बिचल्ली
आफन्त मात्रै उसका भकुल्ला
आशक्त उस्तै बनका बकुल्ला ।३।🌷🙏🌺
आतिथ्य मार्यो घरमा कुटायो
एकाग्र आफ्नै दलमा छिरायो
सामिप्य रोज्यो सपना दिएर
पाखण्ड पस्क्यो बदला लिएर ।४।🌷🙏🌺
सामान्य मान्छे अरुवा बनायो
पापिष्ठ मान्छे भरुवा बनायो
एकाध मान्छे पथमा ढुकायो
भण्डार फोर्यो ढुकुटी लुकायो ।५।🌷🙏🌺
सन्दिग्ध बानी उसले बसायो
विज्ञप्ति छाप्यो मिडिया फसायो
सम्पूर्ण गाथा कविता सुनायो
धन्सार रित्तो जनता भुलायो ।६।🌷🙏🌺
विज्ञान जस्तो जगमा जुनी हो
नोक्सान धेरै धनको भएको
कल्पान्त यस्ता ठग ती चिनौँ है
व्यक्तित्व यस्तो नहुने चुनौँ है।७।🌷🙏🌺
हरि शर्मा(गलकोटे कवि)
मिशिगन, अमेरिका । 🌷🙏🌺
