सबैले खोज्छन् आफैले लिन, दिने खै को होला ?
अरुको भाग खोसेर लिँदा परेको अन्योल
धनको खोजी मानको खोजी सुखको चाहना
सबैले खोज्ने आफूको लागि मान र सम्मान ।१।🌷🙏🌺
खोज्दैन किन मानव जाति फर्केर आफूमै
अर्काको मुख ताकेर बस्ने गरेको किन खै ?
उद्देश्य बिना डुलेको किन बेकामे बनेर
उचालिदेलान् काँधमा राखी अरुले भनेर ।२।🌷🙏🌺
अरुले खुशी दिनेछ भन्दा निराशा मिल्नेछ
आफूले दिन्छु भनेर सोच्दा उत्तम देखिन्छ
सुखको श्रोत मानवभित्र लुकेर बस्दछ
मानव भने सुखको खोजी अन्यत्र गर्दछ ।३।🌷🙏🌺
प्रशंसा माग्ने श्याबासी लिने कृपया भनेर
दिएको दिन देखिन्न कतै दयालु बनेर
सोचेको कोही देखिन्न कतै अरुको भलाई
सबैले सोध्दछन् कोसेली खै के ल्याएको मलाई ?।४।🌷🙏🌺
भिखारी मात्र अरुको आशा गरेर बस्दछ
सबल मान्छे कर्मले आफू सफल बन्दछ
अरुको काँध चढेर कोही सफल बनेमा
पाएको मान हराईजान्छ छिनको छिनमा ।५।🌷🙏🌺
नेताले लाज नमानिकन भिखारी बनेका
आफूको घर जलाईकन खरानी बाँडेका
जलाई घर बासको खोजी भिखारी बनेर
मार्दछन् दाता चुनाव पछि शिकारी बनेर ।६।🌷🙏🌺
हरि शर्मा(गलकोटे कवि)
मिशिगन, अमेरिका । 🌷🙏🌺
