निरेम प्रोडक्सन तथा अल मुल्ला एक्सचेन्जको संयुक्त प्रस्तुतिमा आयोजना गरिएको “Nirem Musical Event 2026” का अवसरमा नेपालबाट आमन्त्रित चर्चित गायक राजु लामा सहित स्थानीय कलाकारहरूको आकर्षक प्रस्तुति रहने गरी भव्य सांगीतिक कार्यक्रम सम्पन्न भएको छ।
निरेम सांगीतिक उत्सवको अवसर पारेर Aspire Indian School, जिलिब, कुवेत मा आयोजना गरिएको उक्त कार्यक्रममा कुवेतका लागि नेपालका माननीय नेपाली राजदूतज्यूको विशेष उपस्थिति रहेको थियो। राजदूतज्यूले कार्यक्रमलाई सम्बोधन गर्दै प्रवासमा आयोजना गरिने यस्ता सांस्कृतिक कार्यक्रमहरूले नेपाली भाषा, कला र संस्कृतिको संरक्षण तथा प्रवर्द्धनमा महत्वपूर्ण भूमिका खेल्ने उल्लेख गर्नुभयो।
कार्यक्रममा मुख्य आकर्षणका रूपमा गायक राजु लामाले आफ्ना चर्चित तथा लोकप्रिय गीतहरू प्रस्तुत गर्दै उपस्थित दर्शक–श्रोताहरूलाई मन्त्रमुग्ध पारेका थिए। त्यसैगरी कुवेतमा सक्रिय स्थानीय नेपाली कलाकारहरूले पनि विविध सांगीतिक तथा सांस्कृतिक प्रस्तुति प्रस्तुत गर्दै कार्यक्रमलाई अझ रंगीन बनाएका थिए।
कार्यक्रममा कुवेतमा बसोबास गर्दै आएका विभिन्न पेशा तथा क्षेत्रका नेपाली समुदायको उल्लेखनीय सहभागिता रहेको थियो। सहभागीहरूले स्थानीय कलाकारहरूलाई पनि यस्ता अन्तर्राष्ट्रिय स्तरका कार्यक्रममा प्रस्तुति दिने अवसर प्राप्त हुनु सकारात्मक पक्ष भएको प्रतिक्रिया दिएका छन्।
कार्यक्रम Nirem Productions को व्यवस्थापनमा तथा Al Mulla Exchange को प्रमुख सहयोगमा सम्पन्न भएको हो। आयोजक संस्थाले कार्यक्रम सफल बनाउन सहयोग गर्ने सम्पूर्ण कलाकार, प्रायोजक, स्वयंसेवक तथा दर्शकप्रति धन्यवाद व्यक्त गर्दै आगामी दिनहरूमा अझ स्तरीय र प्रभावशाली कार्यक्रमहरू आयोजना गर्ने प्रतिबद्धता जनाएको छ।
