वर्ण-२१, विश्राम ७,७,७ > 🌷🙏🌺
कोरोनाले सतायो, हरबखत डुब्यौँ, दु:खमा वेदनामा
पाखण्डीले डुबायो, विरुत विरहको, तालमा पोखरीमा
नानाभाँती गरायो, खलखल पसिना, देहमा ताडनामा
डाँडापाखा रुँदैछन्, धुरुधुरु विचरा, शान्तिको कामनामा ।१।🌷🙏🌺
कोरोनाको चपेटा, कहर शहरमा, गाउँमा वेदनामा
आशा त्यान्द्रो हरायो,झन झन थपियो, कष्ट यो जीवनीमा
माता देवी पुकारे हरहर जनले, दु:खको भूमरीमा
नेता मस्ती गरेका, अटुट कपटको, आडमा उच्चतामा ।२।🌷🙏🌺
पापी नेता कुकर्मी, अनुसरण गरे, दानवी भावनाको
सत्यानाशै गरेका, कुमति असुरले ,सभ्यता भव्यताको
ताराबाजी भएको,अपुग रहरको, जीवनी कल्पनाको
कालो कौवा करायो, अपशकुन भनी, दुर्दशा दुष्टताको ।३।🌷🙏🌺
आफ्ना मान्छे लिएका, सबल प्रमुखको, कार्यमा भूमिकामा
सालासाली रमाए,अकुत रकमको, मातमा दुष्टतामा
कुम्ल्याएका प्रशस्तै हरसमय लुटी, साथमा धृष्टतामा
रोएका छन् बिरामी, सडक सडकमा,चोकमा ताडनामा ।४।🌷🙏🌺
जानाजानी कसैले,कुटपिट नगरौँ, देशको भावनामा
आनीबानी सुधारौँ,प्रतिदिन घरमा,राष्ट्रको शुध्दतामा
आशा बोकी सुनौलो,झटपट पथमा, लम्किँदै कामनामा
नेपालीको कसैले, अपहरण नगरौँ, शान्तिको चाहनामा ।५।🌷🙏🌺
हरि शर्मा
मिशिगन, अमेरिका ।🌷🙏🌺
