भान्सामा चम्चा कोठामा चम्चा हातमा मुखमा।
गरिमा ठूलो इज्जत ठूलो छिनको छिनमा ।
देशमा चम्चा बिदेश चम्चा चम्चाको महिमा।
नेपाली हामी सारै नै नामी चम्चाको दौडमा ।१।
कसैले घोल्छन सुखमा दारु औषधी दु:खमा।
सुरुप्प सुप पुर्यायो खुब चम्चाले मुखमा।
अस्तिको कुरा सुटुक्क माथि पुर्यायो चम्चाले।
साथीको घाँटी परक्क पारी निमोठ्यो चम्चाले ।२।
आलुको जस्तो जहाँ नि मिल्ने चम्चाको चटक।
जोसँग पनि साखुल्ले बनी देखायो नाटक ।
राजनितिक दल छलको बल चम्चाको आडमा।
प्रशस्त मिल्ने चटके चम्चा तुरुन्त भाडामा ।३।
सुटुक्क गरी छिरेछ चम्चा साहित्य क्षेत्रमा।
लुपुक्क लिटो पुर्याई हाल्यो कविको मुखमा।
चम्चाका नेता बनेका कवि चम्चाको चालमा।
गुलियो मुख बनायो चम्चा नाच्दैछ्न् तालमा ।४।
अमेरिकामा यथेष्ट मिल्छ्न् चम्चाका चटक।
नेपाली चम्चा जितेको देख्छु पटक-पटक।
अचेल यहाँ बाँदर पनि चम्चाले खाँदैछ।
कोरोना अर्थ लोकमा मान्छे कोठामा बन्द छ ।५।
हरि शर्मा(गलकोटे कवि)
गलकोट- बागलुङ, नेपाल
हाल: मिशिगन अमेरिका ।
