तितोपाटी – भाद्र शुक्ल तृतीयाका दिन आज हिन्दू नारीले उल्लासका साथ हरितालिका तीज पर्व मनाउँदै छन् । पाैराणिक कथाको अनुसार पर्वतराज हिमालय पुत्री पार्वतीले शक्तिसम्पन्न शिवजीलाई वर पाउन निराहार बसी गरेको तपस्या सफल भएपछि योग्य वर पाएकी थिइन् । त्यसपछि यो पर्व मनाउने चलन बसेको हो ।
भाद्र शुक्ल तृतीयामा व्रत बसी शिव पार्वतीको पूजा, उपासना गरेमा सुख, शान्ति र कल्याणको प्राप्ति हुने धार्मिक विश्वास छ । परापुर्व काल देखि नै यो व्रत गर्ने महिलाहरूले मात्रै बस्दै आएको भए पनि नारी पुरूष दुबैले व्रत बस्न सकिने र पुरूषले व्रत बसे पुरूष विधुर हुनु नपर्ने, नारीले व्रत बसे अटल सौभाग्य र अविाहित केटा केटीले व्रत बसे गुण सम्पन्न वर वा वधु पाउने मान्यता छ ।
सत्ययुगमा हिमालय पुत्री पार्वतीले गौरीघाटमा बसी तपस्या गरेर श्री महादेव पति पाउने वरदान पाएकी थिइन् । तर पिता हिमालयले पार्वतीको इच्छा विपरित विष्णुसित विवाह गरिदिन खोजेपछि साथीहरुलाई आफ्नो समस्या सुनाइन् । पार्वती समस्यामा परेको थाहा पाएपछि उनका साथीहरुले हरण गरेर लगी कसैले नदेख्ने ठाउँमा लुकाएर राखिदिए । साथीहरुले लुकाएकै ठाउँमा पार्वतीले निराहार व्रत गरी महादेवलाई प्राप्त गरिन् ।
आजको दिनमा शिव मन्दिर र शिवालयहरुमा दर्शनार्थीको विशेष भिड हुन्छ । लगभग आजको दिन पशुपतिनाथ मन्दिर परिसर रातो रंगमा सजिएका हर्षित, उत्साहित विवाहित, अविवाहित महिलाहरूको बाक्लै उपस्थिति हुने गर्दछ तर यस वर्ष भने विश्वव्यापी महामारी कोभिड – 19 को कारण चाैतर्फी स्वास्थ्य सतर्कता अपनाउन पर्ने भएकोले स्वास्थ्य सुरक्षालाइ ध्यानमा राखी पशुपतिनाथ मन्दिर लगायत मठ मन्दिरहरू खुला रहेका छैनन् ।
