स्वर्गको टुक्रा निलुवा
नेपाली लोक छन्द(झ्याउरे)
***********
बागलुङ, जिल्ला गलकोट भेगको गहना निलुवा ।
शिरमा बोकी बसेको गाउँ भनिन्छ चमुवा । १ ।
चमुवा पारी नुवाकोट पर्छ कविको घर त्यो ।
यो कवि पनि निलुवा घुम्न थियो नि पल्केको । २ ।
नुवाकोट बाट खरुवा हुँदै निलुवा पुग्दथ्यो ।
निलुवाको सुन्दरता देख्दा शिर नै झुक्दथ्यो । ३ ।
स्वर्गको टुक्रा एउटा त्यहाँ टुक्रेर खसेको ।
सुन्दरता सबै आफैमा बोकी थुचुक्क बसेको । ४ ।
अत्यन्तै सुन्दर मनको टुक्रा चुँडेर लिन्छ कि ।
निलुवा नाम रहेको यसको सुर्लुक्क निल्छ कि ।५ ।
बनको बिच समथर भु-भाग आकर्षक निलुवा ।
रोपेको देख्छु स्याउका त्यहीँ स-साना बिरुवा ।६ ।
सुन्दरताको गरेर बयान मुखले मेटिन्न ।
यो जस्तो सुन्दर मनमोहक ठाउँ खोजेर भेटिन्न । ७ ।
हरि शर्मा (सुबेदी)
गलकोट- नुवाकोट, बाग्लुङ, नेपाल
हाल: मिसिगन अमेरिका
