“च्यातिएको मन”
-राम भण्डारी
पीडा पछिको खुसी क्षणभरमै बिलाएर गयो ।
सल्किएको झिल्कोमा पानी मिलाएर गयो ।।
प्लेन भाडा तेब्बर किन माहामारीको बेलामा ।
गलत के गर्यौं र परदेशी लाई राख्यौ हेलामा ।।
राहत खोई सरकार के सबैतिर फाईदै चाहिने ?
पैसाकै बलमा मात्रै आफ्नो देश फर्किन पाईने ?
पहिला को दैविक विपत्तिमा हाम्रै सहयोग लियौ ।
अहिले तिम्रो शख्त जरुरी छ,तर मुख मोडिदियौ ।।
धनको लोभमा पर्यौ, गलत मोह कस्ले सिकायो ?
मौका यहि हो भनिकन कमाउने खेल बिछ्यायो ।।
धन लाभ गर्न, सरकार! कोरोनाको दबाई बनाऊ ।
बिनम्र अनुरोध,गहिरो चोटमा नुन-चुक नलगाऊ ।।
गर्जो टार्न परदेश लागियो धितोमा कर्जा लिएर ।
भए यथेष्ट अर्थ पोल्टामा,बस्थ्यौं किन आँसु पिएर ।।
के गरिब हुनु अभिशाप हो? धनि हुनु बरदान ।
परदेशीनु बाध्यता रह्यो, अभाव भयो बलबान ।।
बिर्स्यौ गुन, हाम्रो खाँचो अब कहिले नपर्ला र ?
दुःखी पीडित परदेशी निचोरेर तेलै के झर्ला र ?
सबका आशाका केन्द्रबिन्दु तिमी मात्रै थियौ ।
निसास्सिएका मनहरुलाई किन धोका दियौ ।।
पुराना भए गलैंचाहरु खोजी खोजी फेरिदिने ?
च्यातिएको मनहरु कसले कहिलेसम्म हेरिदिने ?
