गजल
-तारा अर्याल
मेरा आमाबाबुको काख रित्तो पार्यौ जात मिलेन भनी ।
मलाई संगै मेरा सपनाहरु मार्यौ जात मिलेन भनी ।।
हाँसेका थिए सबैका ओठ मैले बुहारी ल्याउने आसमा
ति हाँसोलाइ खोसेर आँसु झार्यौ जात मिलेन भनी।।
रगत मिल्थ्यो मन मिल्थ्यो चाहना थियो संगै जिउने
प्रेमको नाममा ज्यान लिएर टार्याै जात मिलेन भनी ।।
मानव नाम गरेको राक्षसले के बुझ्ला मायाको अर्थ
समाजै उल्टेर मृत्युको बारले बार्यौ जात मिलेन भनी ।।
आएको थिएँ धर्तिमा सुन्दर घर बसाउने सोच बोकी
प्राण खोसी संसारबाटै मलाइ तार्याै जात मिलेन भनी ।।
हाल – बिरानो मुलुक
