नाराइल जिल्लाको कालिया उपजिल्लास्थित बेन्दर चार क्षेत्रमा साँझ करिब ७ बजे मोटरसाइकल र्यालीमाथि आक्रमण भएको थियो। आक्रमणमा परी मृत्यु हुनेमा किसान दलका स्थानीय नेता शाहिनुर इस्लाम र बीएनपीको सांस्कृतिक सङ्गठनका नेता सोहेल मोल्ला रहेका छन्।
प्रहरी र स्थानीय अधिकारीका अनुसार प्रदर्शनमा सहभागीहरू फर्किंदै गर्दा केही व्यक्ति पछाडि छुटेका थिए। त्यही क्रममा स्थानीय रूपमा बनाइएका हतियारसहित आएका समूहले उनीहरूमाथि आक्रमण गरेका थिए। आक्रमणकारीले केही मोटरसाइकलमा आगजनीसमेत गरेका थिए।
गम्भीर घाइते भएका दुवै नेतालाई सुरुमा स्थानीय स्वास्थ्य केन्द्रमा उपचार गरिए पनि अवस्था बिग्रिएपछि थप उपचारका लागि खुल्ना लैजाँदै गर्दा मृत्यु भएको बताइएको छ। घटनामा अन्य केही व्यक्ति पनि घाइते भएका छन्।
स्थानीय प्रशासनले प्रारम्भिक सूचनाका आधारमा प्रतिबन्धित अवामी लिगका कार्यकर्ताको संलग्नता रहेको आशङ्का गरेको छ। प्रहरीले घटनामा संलग्न व्यक्तिहरूको पहिचान तथा खोजी भइरहेको जनाएको छ। यद्यपि, आरोपितहरूको दोष अनुसन्धान र कानुनी प्रक्रियाबाट पुष्टि हुन बाँकी छ।
बङ्गलादेशमा अवामी लिगका गतिविधिमाथि प्रतिबन्ध लागेपछि राजनीतिक तनाव र हिंसात्मक घटनाहरू बढिरहेका छन्। पूर्वप्रधानमन्त्री शेख हसिनाको दलले नोभेम्बर १९ मा देशव्यापी बन्दको आह्वान गरेको पृष्ठभूमिमा विभिन्न स्थानमा आगजनी, विस्फोट र राजनीतिक झडपका घटना भएका छन्।
स्रोत: बीबीसी बाङ्ला,