सरकारले रसुवा, नुवाकोट, धादिङ लगायत बाढी प्रभावित क्षेत्रमा स्थानीय प्रशासनको पूर्वस्वीकृतिबिना ड्रोन उडाउन निषेध गरेको छ।
गृह मन्त्रालयले शनिबार विज्ञप्ति जारी गर्दै उद्धार कार्य जारी रहेका बेला केही व्यक्ति तथा संस्थाले अनुमति नलिई ड्रोन उडाएको पाइएको जनाएको छ। यसले हवाई सुरक्षामा गम्भीर जोखिम उत्पन्न गर्नुका साथै उद्धार अभियानमा अवरोध पुग्न सक्ने मन्त्रालयको भनाइ छ।
मन्त्रालयले राष्ट्रिय विपद् न्यूनीकरण तथा व्यवस्थापन प्राधिकरणको समन्वयमा नेपाली सेना तथा निजी क्षेत्रका हेलिकप्टरहरू उद्धार कार्यमा परिचालित रहेकाले अनधिकृत ड्रोन उडान नगर्न आग्रह गरेको छ।
साथै, आवश्यक अनुमति नलिई ड्रोन सञ्चालन गर्ने व्यक्ति वा संस्थामाथि प्रचलित कानुनअनुसार कारबाही गरिने चेतावनी पनि दिइएको छ।
