नेपालको भारतीय सीमाना जोडिएको वीरगन्जमा सोमबार साँझ ५ बजेदेखि कर्फ्यु लगाइएको छ । दुई धार्मिक समूहबीच उत्पन्न तनावका कारण यो कर्फ्यू लगाइएको हो ।
पर्साका जिल्ला अधिकारी दिनेशसागर भुसालले जारी गरेको आदेशअनुसार सोमबार साँझ ५ बजेदेखि अनिश्चितकालीन कर्फ्यु लगाइएको हो । उक्त आदेश अनुसार अर्को आदेश नभएसम्म भीड जम्मा गर्ने, विरोध प्रदर्शन गर्ने, बाहिर घुम्ने जस्ता गतिविधि गर्न पाइने छैन । यसअघि पर्साको छिमेकी जिल्ला रौतहटको मोतीपुरमा बसन्तपञ्चमी पर्वमा मूर्ति विसर्जनका क्रममा दुई समुदायबीच झडप भएपछि त्यहाँ विगत पाँच दिनदेखि कर्फ्यु जारी छ । यो तनाव वीरगन्जसम्म पनि फैलिएको स्थानीय प्रशासनले जनाएको छ । सोमबार दिउँसो प्रदर्शनकारीले बजार बन्द गरेपछि प्रहरीसँग झडप भएको थियो ।
प्रदर्शनकारीले पहिले प्रहरीमाथि ढुंगामुढा गरेपछि प्रहरीले भीडलाई तितरबितर गर्न १० राउण्डभन्दा बढी अश्रुग्यास प्रहार गरेको थियो । रौतहटमा अहिले अवस्था सामान्य बन्दै गएको स्थानीय प्रशासनले दावी गरेको छ । रौतहट जिल्ला प्रशासनका सूचना अधिकारी मणिभूषण शाहले अवस्था सामान्य भए पनि दुई पक्षबीच झडप हुनसक्ने सम्भावनालाई मध्यनजर गर्दै सावधानीका रुपमा कर्फ्यु जारी राखिएको बताए ।
