Friday 14th May 2021

कविताः मान्छे -सविता के.सी.


मान्छे सौदा गर्दछ
लासको पनि पैसा माग्दछ
सुन्दै अनौठो लाग्ने व्यवहार
अरुले त के गर्ला मान्छे गर्दछ ।

बाख्राको छोरा बोका, मान्छे काटेर खान्छ
भैँसीको छोरा राँगाको अनेक परिकार बन्दछ
गौमाताकै छोरा बहरलाई पनि
सुमरेर गोरु बनाए
हलो नारी खेत जोताए
वास्तवमै मान्छे एकदम निष्ठुरी छ ।

मान्छे अरुको विनास गर्दछ
आफ्नै जातित्वको मात्र विकास गर्दछ
जङ्गल फाँड्छ सडक बनाउँछ
जङ्गली जनावर र चराचुरुङ्गीलाई हाहाकार हुन्छ
मान्छे गाडीमा चढी सररर …. गुड्छ
जङ्गल भित्र पस्छ मान्छे शिकार गर्छ
अरुका सन्तान मासेर आफू मासु खान्छ
वास्तवमै मान्छे एकोहोरो स्वभावको छ ।

हिँड्ने बाटो व्यापार विछ्याउँछ
गुड्ने सडकमा बच्चा फिजाउँछ
जिउँदा सन्तान लास बनाउँछ
लासको पनि भाउ राख्छ
बाटोमा तगारो राखी पसल खोलेर व्यापार गर्छ
सन्तानको लास बेचेको पैसाले
मान्छे दिनहुँ दालचामल किनी छाक टार्छ
वास्तवमा मान्छे अपारको छ ।

मान्छे मान्छे बीच सम्झौता हुन्छ
मान्छे मान्छेमा किनबेच हुन्छ
मान्छेमा विश्वास अनि धोका हुन्छ
मान्छे शब्दले रेट्दछ, बोलीले गोली हान्दछ
मान्छे, म र मेरा लागि मर्न र मार्न सक्दछ
वास्तवमा मान्छे प्रकृतिमाथि लिला रच्दछ
वास्तवमा मान्छे प्रकृति कुल्ची माथि पुग्न खोज्दछ
वास्तवमा मान्छे अति स्वार्थी छ
मान्छे अति स्वार्थी छ ।

सविता के.सी.
फर्पिङ , काठमाडौ


Loading...
सम्बन्धित शीर्षकहरु

हरी कृष्ण न्यौपाने- स्याङजा घर भई लामो समय देखी पोखरामा बसोबास गरिरहेका र कुवेतमा रोजगारीका क्रममा रहेका टेकन गुरुङ ३…

तीतोपाटी - विश्वव्यापी कोरोना महामारीको दोश्रो लहर फैलिए यता नेपालमा कोरोना संक्रमित हुने र ज्यान गुमाउनेको संख्या बढ्दो छ ।…

रसै रुद्रैश्छिन्ना, यमनसभलाग: शिखरिणी ।🌷🙏🌺 म खाऊँ मैँ लाऊँ सुखसयल वा मोज म गरूँ म बाँचूँ मैँ नाचूँ अरु सब…

प्रतिकृयाहरू