Sunday 22nd November 2026

लघुकथाः “जानकी” -पुष्पा नेपाल (सुवेदी)


आफूभन्दा मुनि दुई भाइ र एक वर्षकी सानी बहिनी जानकीको पोल्टामा सुम्पेर उनकी आमा परलोक हुँदा ऊ केवल १३ वर्षकी मात्र थिइ।
कक्षा सातमा पढ्दै गरेकी जानकीको टाउकोमा पहाड खसेको थियो । जस्तै परिस्थिति पनि मान्छेले सामना गर्नैपर्ने प्राकृतिक नियमानुसार नै जानकीले पनि परिस्थितिसँग जुध्न थाली।

अन्तिम श्वास लिदै गर्दा उस्की आमाले “जानकी सानी बहिनीको राम्रो हेरचाह गरेर हुर्काउनु र पढाएर ठूलो मान्छे बनाउनु है” भनेको कुरा सम्झदै बहिनीलाई रातभरि काखमा राखेर आँशुको दहमा डुबिरहन्थी।

समयले उस्को घाउमा मल्हम लगाएर पुरिदिदै थियो । ऊ भने साना भाइबहिनीहरुको सेवामा यति तल्लिन भई कि उस्ले आफ्नो पढाइ पनि छोडिसकेकी थिइ । भाइबहिनीहरुको हेरचाह, मेलापात, घरधन्दा सबै उसैको जिम्मामा थियो । हुनत बाबुले सौतेनी आमा पनि भित्र्याईसकेका थिए तर पनि सारा कुराको बोझ भगवानले उसैका लागि बनाइदिएको प्रतित हुन्थ्यो ।

उसकी बहिनीले गाउँकै विद्यालयबाट एसएलसी पास गरेर शहरतिर पढ्न हिड्दा उस्लाई आमाले आएर “स्याबास जानकी” भने झै लागिरहेको थियो र यति खुशी थिइकी, लाग्थ्यो बहिनी भन्दा बढी ऊ नै खुशी छे।

तर मान्छेले चाहेजस्तो कहाँ हुन्छ र! निष्ठुरी त्यो शहरले उसकी बहिनीको रङ फेरिदिइसकेको थियो । बहिनीले पढाइ सकेर जानकीलाई खबरै नगरी शहरिया राजकुमारलाई आफ्नो बनाई सकेकी थिइ र बिर्सिसकेकी थिइ, आमा बनेर हुर्काउने दिदी अनि ऊ जन्मेको गाँउ।

यता जानकी बहिनीको खुशीमा रमाउँदा रमाउँदै आफ्नो जवानी कहिले आएर सकियो? खुशी कता हरायो? थाहा पाउनै सकेकी थिइन ।
उमेरले नेटो काटिसकेकी जानकीलाई एकदिन उसकै बाबु र सौतेनी आमाले यौटा विदुरको साथ लगाएर पठाइदिए । लोग्नेको घरमा पनि सौताले उसलाई उपहारमा छोडेकी स-साना नानीहरूको स्याहार सुसारमा दिनहरू बिताउन थाली,आफ्नै आमाको आशीर्वाद सम्झेर।

पुष्पा नेपाल (सुवेदी )
इलाम


सम्बन्धित शीर्षकहरु

लन्डन, नोभेम्बर २१। विश्वकै घातक र उपचार गर्न कठिन मानिने अग्न्याशय (प्यान्क्रियाज) को क्यान्सर उपचारमा वैज्ञानिकहरूले नयाँ आशाजनक उपलब्धि हासिल…

बङ्गलादेशको नाराइल जिल्लामा प्रतिबन्धित अवामी लिगका कार्यकर्ताले गरेको भनिएको आक्रमणमा बङ्गलादेश नेसनलिस्ट पार्टी (बीएनपी) का दुई स्थानीय नेताको हत्या भएको…

म्यानमारको सेनाले रोहिंग्या मुस्लिम समुदायमाथि सन् २०१७ मा गरेको सैन्य दमनलाई नरसंहार ठहर गर्दै अन्तर्राष्ट्रिय न्यायालय (आईसीजे) ले ऐतिहासिक फैसला…

प्रतिकृयाहरू
...