महत्व शिलाको
*************
सम्बन्ध अति पुरानो पर्यो मान्छे र शिलाको ।
यसकै बखान गरौँ कि भनी कविता मिलाको । १ ।
आदिम काल ओढार बस्दा शिलाको चिनजानी ।
शिलामै सुत्ने शिला नै ओढ्ने शिलाकै सिरानी । २।
जनावर मार्न हतियार बन्यो शिलाको धारिलो ।
काठको टुप्पो त्यो चुच्चे ढुङ्गो देखियो भरिलो । ३ ।
कृषीको युग ढुङ्गाको घर माटो नि मिलेको ।
यसैको भर मान्छेले मानी छ आज हिँडेको । ४।
ढुङ्गाको कमाल्, ढुङ्गाकै बाघचाल ढुङ्गामा बसेर ।
ढुङ्गाको मुनी माछाको घर खोलामा पसेर । ५।
धपाउन मिल्ने चरा वा बाँदर ढुङ्गामै बसेर । ।
हातमा राखी मिल्काउन मिल्ने मुठीमा कसेर । ६।
घरमा बन्छ शिलाको परखाल खोलामा बाध नि ।
चाहेको जस्तै जस्ताको तस्तै ढुङ्गा त्यो बन्दिने । ७।
ढुङ्गाको मन्दिर ढुङ्गाको तस्बिर मूर्ति नि ढुङ्गाको ।
ढुङ्गामा कला इतिहास ढुङ्गा अभिलेख यसैको । ८।
ढुङ्गाको छाती बनी पो दिन्छ बलिया बाङ्गाको ।
निष्ठुरी बन्दा मन पनि यहाँ बन्दछ ढुङ्गाको । ९।
मनुश्य चोला सफल पार्न ढुङ्गा हो सारथी ।
ढुङ्गाको मूर्ती बनाइकन गरेको आरती । १०।
हरि शर्मा (सुबेदी)
गलकोट-बागलुङ, नेपाल ।
हाल: मिसिगन-अमेरिका ।
