Sunday 5th May 2024

रोल्पाका दिल बहादुर ६७ लाख ब्लड मनी तिरेर स्वदेश फर्के


तितोपाटी – रोल्पा जिल्लाको रोल्पा नगरपालिका–१० धबाङ पेवा गाउँका ३० वर्षीय दिलबहादुर  घर्ती करिब ६७ लाख रुपैयाँ ब्लड मनी (क्षतिपूर्ति रकम) तिरेपछि साउदी अरेबियामा जेलजीवनबाट मुक्त भर्इ स्वदेश फर्केका छन् । उनी  दुई वर्षअघि साउदीको राजधानी रियादमा जेल परेका थिए । दिलबहादुर यसै सेप्टेम्बर ५ तारिख (भदौ २१ गते) जेलमुक्त भएका हुन् । ब्लड मनी तिरेको ३७ दिनपछि उनी नेपाल पुगेका हुन् ।

शनिबार बिहान १० बजे दिलबहादुरकी श्रीमती मनिका, दुई छोराछोरी, आफन्तलगायत दिलबहादुर बचाउ अभियानमा जुटेका अभियन्ताहरुले उनलाई त्रिभुवन अन्तर्राष्ट्रिय विमानस्थलमा पुष्पगुच्छा, फूलमाला र खादा ओढाएर स्वागत गरे । शुक्रबार रोल्पाबाट रात्रि बसको लामो यात्रा गरी शनिबार बिहान काठमाडौं आएका मनिका र उनका छोराछोरी थकाइका बीच पनि निकै खुसी देखिएका थिए ।

साउदीस्थित नेपाली दूतावासको प्रतिनिधिको रोहबरमा दिलबहादुर रिहा भएका हुन् । दिलबहादुर रियादस्थित मजेद अलदियाबही कन्ट्राक्टिङ एण्ड इस्ट नामक कम्पनीमा ट्रकचालकको रुपमा कार्यरत थिए । साउदी छिरेको ३ महिनामै २०१६ जुन १३ तारिखका दिन दिलबहादुरले चलाउँदै गरेको ट्रकले साउदी नागरिक मोटेबबिन अतिखबिन दअफाको कारलाई ठक्कर दिँदा ती साउदी नागरिकको मृत्यु भएपछि उनी जेल चलान भएका थिए ।

साउदी नागरिक मृत्यु अभियोगमा त्यहाँको अदालतले दिलबहादुरको ७५ प्रतिशत गल्ती देखाएको थियो । अदालती फैसलाबमोजिम उनीरियादमा बन्दी जीवन बिताइरहेका थिए । अदालतले तोकेको ब्लड मनी साउदी रियाल २ लाख २५ हजार सम्बन्धित मृतकको परिवारलाई तिरे मात्र रिहाइ हुने अवस्था थियो । यति धेरै रकम उनी र उनको परिवारले केही गरी पनि तिर्न सक्ने ल्याकत थिएन । आर्थिक अवस्था कमजोरका कारण नेपाली रकम ६७ लाख रुपैयाँ तिर्न नसक्दा जेलमै रहनु परिरहेको समाचार सार्वजनिक भएपछि उनलाई कैदमुक्त गर्न ब्लड मनी संकलन सुरु गरिएको थियो ।

उपराष्ट्रपति नन्दबहादुर पुनका पुत्र दीपेश पुनको संयोजकत्वमा ४१ सदस्यीय दिलबहादुर बचाउन ब्लड मनी संकलन अभियान समिति गठन गरी स्वदेश तथा विदेशमा रहेका नेपालीबाट सहयोग रकम संकलन गरिएको थियो । उनका लागि १ करोड ४ लाख २६ हजार रुपैयाँ ब्लड मनी संकलन भएको थियो । आवश्यकता भन्दा ३७ लाख २६ हजार रुपैयाँ बढी रकम उठेको हो । बाँकी रहेको रकमका सवालमा सोमबार दिउँसो पत्रकार सम्मेलन गरी जानकारी गराइने समितिका सचिव जीवनप्रवेश रोकामगरले बताए ।

जेल जीवनबाट छुटकारा भएपछि दिलबहादुरले नयाँ जीवन पाएको बताए ।


सम्बन्धित शीर्षकहरु

जापानका परराष्ट्रमन्त्री कामिकावा योको नेपालको औपचारिक भ्रमणमा आज यहाँ आउँदै छिन्। उपप्रधानमन्त्री एवं परराष्ट्रमन्त्री नारायणकाजी श्रेष्ठको निमन्त्रणामा परराष्ट्रमन्त्री योको भ्रमणमा…

पुष्कर अथक रेग्मी - गण्डकी माहात्म्य अनुसार मुक्तिक्षेत्र, रूरूक्षेत्र, रामपुरक्षेत्र र देवघाट हरिहरक्षेत्र समेतको परिसरलाई गण्डकी क्षेत्र मानिएको छ ।…

नेपाल मेरो जन्मभूमि र कर्मभूमि हो युवाले यो देशको गरिमा र शान बढाउन पर्ने हो   नेपाल आमाको मुहारमा मुस्कान…

प्रतिकृयाहरू
...