तीतोपाटी-दाङमा प्रहरीले विभिन्न स्थानमा छापामारेर ३९ जना जुवाडे पक्राउ गरेको छ ।
उनीहरूको साथबाट प्रहरीले ३ लाख ३६ हजार रकम बरामद गरेको छ । शनिबार बिहान पश्चिम दाङका दुई स्थानमा प्रहरीले छापा मारेको छ । ती स्थानबाट २ लाख ७६ हजार रुपियाँसहित ३९ जना जुवाडे पक्राउ परेका छन् ।
तुलसीपुर उपमहानगरपालिका वडा नं. १२ टरिगाउँस्थित रमेश चौधरी र दंगीशरण गाउँपालिका वडा नं. २ सरुवा डाँडास्थित वीरबहादुर शाह भनिने यामेन शाहको घरमा छापा हान्दा ३९ जुवाडे सहित २ लाख ७६ हजार बरामद भएको प्रहरीले जनाएको छ ।
शाह सत्तारुढ नेपाल कम्युनिस्ट पार्टी (नेकपा)का नेता एवम् प्रदेश सांसद उत्तरकुमार ओलीका स्वकीय सचिव पनि हुन् । प्रदेश सांसद ओलीका स्वकीय सचिव शाहको घरमा छापाहानेर जुवाडेलाई पक्राउ गरे पनि शाहलाई पक्राउ नगरिएको दाङका निमित्त प्रहरी प्रमुख रामप्रसाद घर्तीले बताए ।
उनले टरिगाउँस्थित चौधरीको घरमा शनिबार बिहान २ बजेतिर छापाहान्दा १५ जना जुवाडेसहित ८७ हजार ३ सय रुपियाँ बरामद भएको बताए ।
दंगीशरण गाउँपालिका वडा नं. २ को सरुवा डाँडास्थित नेकपाका नेता शाहको घरमा छापा हान्दा २४ जना जुवाडेका साथबाट १ लाख ८९ हजार नगद बरामद भएको बताएका छन् ।
नेकपाका नेता एवम् प्रदेश सांसद ओलीका स्वकीय सचिव शाहको घरबाट ४८ थान कौडा र चौधरीको घरबाट १०४ थान तास बरामद भएको छ ।
