एजेन्सि-अमेरिका र इरानबीच एउटा नयाँ सम्झौताका लागि सहमति जुटेको खबर सार्वजनिक भएको छ । प्राप्त विवरणहरूका अनुसार यस सम्झौतामा जारी युद्धविरामलाई थप ६० दिनका लागि लम्ब्याउने र इरानको परमाणु कार्यक्रमको भविष्यका विषयमा वार्ता सुरु गर्ने बुँदाहरू समावेश छन् ।
तर, अमेरिकी उपराष्ट्रपति जेडी भान्सले भने युद्धको विषयलाई लिएर कुनै पनि ठोस सम्झौतामा पुग्नुअघि अमेरिका र इरानले अझै कैयौँ थाती रहेका विवादित मुद्दाहरू सुल्झाउन बाँकी रहेको स्पष्ट पारेका छन् ।
यसैबीच, बीबीसी पर्सियनका अनुसार इरानको अर्ध(सरकारी समाचार एजेन्सी तस्निमले यो सम्झौताले अझै अन्तिम रूप नपाएको र यसको आधिकारिक पुष्टि हुन बाँकी रहेको दाबी गरेको छ ।
के राष्ट्रपति डोनाल्ड ट्रम्प सम्झौतामा हस्ताक्षर गर्ने तयारीमा हुनुहुन्छ ? भनी बीबीसीले सोधेको प्रश्नको जवाफमा उपराष्ट्रपति भान्सले दुवै पक्ष अन्तिम सम्झौतामा ‘कहिले वा कसरी’ पुग्छन् भन्नेबारे अहिले नै टिप्पणी गर्नु हतारो हुने बताए ।
यसअघि बिहीबार अमेरिकी अधिकारीहरूले बीबीसीलाई दिएको जानकारी अनुसार दुवै देशबीच सम्झौताको खाकामा सहमति भइसकेको छ । यद्यपि, यसलाई राष्ट्रपति डोनाल्ड ट्रम्प र इरानी नेतृत्वले अन्तिम स्वीकृति दिन भने बाँकी नै छ ।
यसैबिच, अमेरिकी सेनाले इरानमाथि संवेदनशील युद्धविरामको उल्लङ्घन गरेको आरोप लगाएको छ ।
