तितोपाटी – खुला सीमाना भएकै कारण नेपाली कामदारहरुको प्रमुख गन्तव्य बनेको भारतमा नेपाली चेलीबेटी बेचविखन पनि मौलाएको समाचार सार्वजनिक भएको छ ।
पछिल्लो एक साताको अवधिमा मात्रै भारतका विभिन्न होटेलबाट ७४ वटा युवतीहरुको उद्धार गरिएको समाचार सार्वजनिक भएको छ । ती नेपाली महिलाहरुलाई दिल्ली महिला आयोगको अगुवाईमा उद्धार गरिएको हो ।
दिल्ली महिला आयोगकी स्वाती मालिवालका अनुसार एक सातामा ३ पटक रेस्क्यु गरिएको हो । मुनिर्का, मैदानगढी र पहाडगञ्जका विभिन्न होटलबाट ७४ जना नेपाली युवतीहरुको उद्धार गरिएको उनले बताएकी छिन् । त्यस्तै अभियानकर्ता अमित मिश्राले कडा शब्दमा ट्वीट गरेका छन् ।
मानव तस्करले नेपाली चेलीहरुलाई भारतका विभिन्न कोठीहरुमा बेचबिखन गर्दै उनीहरुलाई जबरजस्ती यौन कार्यमा लाग्न बाध्य पारिँदै आएको अनुसन्धानले देखाएको छ । भारतमा कति नेपाली युवती बेचिएका छन् भन्ने अहिलेसम्म कुनै तथ्यांक छैन ।
दिल्ली महिला आयोगकी अध्यक्ष स्वातीले पछिल्लो उद्धारका क्रममा पहाडगञ्जको एक होटलबाट ३९ जना युवतीको उद्धार गरिएको बताएकी छन् । नेपाली युवतीहरुलाई श्रीलंका, गल्फ लगायतका देशमा लैजाने भन्दै बेचिने गरेको पाइएको उनले बताएकी छन् । नेपालको भूकम्प प्रभावित क्षेत्रबाट उनीहरुलाई रोजगारीको बहानामा भारत पुर्याइने गरेको उनले ट्वीटमार्फत बताएकी छन् ।
