तितोपाटी – बागलुङको जैमिनी नगरपालिका–१ टुनीबोटमा अविरल वर्षासँगै आएको पहिरोले बस्ती बगाउँदा एक पुरुष बेपत्ता भएका छन् भने पाँच घर पुरिएका छन् । अविरल वर्षाको कारण सोमबार विहान साढे ६ बजेको समयमा बस्तीमाथि रहेको सडकबाट झरेको पहिरोले घर भत्किँदा स्थानीय ६८ वर्षीय हरिकृष्ण शर्मा बेपत्ता भएको जिल्ला प्रहरी कार्यालय बागलुङले जनाएको छ ।
पहिरोले टुनीबोटका देवी शर्मा, इन्द्र शर्मा, रत्नबहादुर क्षेत्री, तारादेवी क्षेत्री, र बेपत्ता हरिकृष्ण शर्माको घर पूर्ण क्षति भएको प्रहरीले जनाएको छ ।
आईतबार विहान पनि सोही ठाउँमा पहिरोले मणीभद्रपाध्याको घर भत्किँदा स्थानीय ६५ बर्षिय लक्ष्मीदेवी पाध्याको मृत्यु भएको थियो । घटना स्थलमा नेपाल प्रहरी र स्थानीयवासीले बेपत्ताको खोजी कार्य सुरु गरेका छन् ।
