ठगी तथा बैंकिङ कसुर मुद्दामा जिल्ला तहबाट दोषी ठहर्याइ थुनामा रहेका लालबहादुर बिक उच्च अदालतको फैसलाले निर्दोष ठहरिएपछि थुनामुक्त भएका छन् । उच्च अदालत विराटनगरले लालबहादुर बिकलाई निर्दोष ठहर गरेको हो । उनलाई उच्च अदालत विराटनगरका न्यायाधीश विपुल न्यौपाने र मिलनकुमार राईको सयुक्त इजलासले सुनसरी जिल्ला अदालतकी तत्कालीन न्यायाधीश निर्मला योङ्याको २०७८ पुस १९ को आदेशलाई उल्टाउँदै मंगलबार अवैध वित्तीय कारोबार सञ्चाल र ठगी मुद्दामा सफाई दिँदै थुनामुक्त गर्ने आदेश दिएको थियो । अदालतको पत्र प्राप्त भएपछि बुधबार बिकलाइ थुनामुक्त गरिएको हो ।
मंगलबार अदालतको पत्र कार्यालय समयमा नपुग्दा उनी बुधबार छुट्ने हल्ला सर्वत्र फैलिएको थियो । उच्चले जिल्ला अदालतको फैसला उल्टाएसँगै विगत सात महिनादेखि हिरासतमा रहेका लालबहादुर रिहा हुने भएका छन् ।
इजाजतबिना बैंक तथा वित्तीय कारोबार र ठगी गरेको आरोपमा लालबहादुर सात महिनादेखि हिरासतमा थिए । यस्तै कृष्णबहादुर विश्वकर्मा गजमेर र सीता विश्वकर्मालाई पनि सफाइ दिइएको छ ।
सिंहदेवी ज्वेलर्सका मुख्य साहुँ दीपक विश्वकर्माको हकमा भने बिना इजाजत बैंक तथा वित्तीय कारोबार र ठगीको दुवै मुद्दामा दोषी ठहर गर्दै सुनसरी जिल्ला अदालतकै फैसला सदर गरिएको छ ।
स्थानीय तहमा लालबहादुर निर्दोष हुन् भन्दै विगतमा दबाबमूलक कार्यक्रम गरिएका थिए भने सामाजिक संजाल र नागरिक स्तरमा निर्दोष मानिसलाइ दोषी ठहर्याइएको भनि निकै विरोध भएको थियो । पछिल्लो समय लालबहादुरको मुद्धामा राष्ट्रिय राजनीतिमा जोडिएकाहरुले समेत उनको न्यायका लागि आवाज उठाउन थालेका थिए । अधिवक्ता समेत रहेकी राष्ट्रिय स्वतन्त्र पार्टीकी सांसद सोविता गौतमले त लालबहादुरको पक्षमा बहस नै गरेकी थिइन् ।
