कतारका प्रधानमन्त्रीले अमेरिकी राष्ट्रपति डोनाल्ड ट्रम्प र उपराष्ट्रपति जेडी भान्ससँग इरानसम्बन्धी विषयमा गरेको छलफलमा सकारात्मक तथा महत्त्वपूर्ण प्रगति भएको बताएका छन्।
कतारका प्रधानमन्त्री तथा विदेशमन्त्री शेख मोहम्मद बिन अब्दुलरहमान अल थानीले अमेरिकी राष्ट्रपति डोनाल्ड ट्रम्प र उपराष्ट्रपति जेडी भान्ससँग छुट्टाछुट्टै भेटवार्ता गरेका हुन्। अल जजिराले छलफलसँग परिचित एक कूटनीतिक स्रोतलाई उद्धृत गर्दै वार्तामा इरानसँगको द्वन्द्व अन्त्य गर्ने विषयमा ‘राम्रो प्रगति’ भएको जनाएको छ। तर वार्ताबाट कुनै ठोस सम्झौता भएको वा सहमति जुटेको विवरण सार्वजनिक गरिएको छैन।
ट्रम्पले पनि कतारी प्रधानमन्त्रीसँगको कुराकानीलाई उत्कृष्ट भन्दै इरानसँगको युद्ध अन्त्य गर्ने दिशामा सकारात्मक वातावरण बनेको बताएका छन्। उनले तत्काल अमेरिकी सैन्य आक्रमण पुनः सुरु हुने सम्भावना न्यून रहेको संकेत गरेका छन्। कतारले अमेरिका र इरानबीच मध्यस्थकर्ताको भूमिका निर्वाह गर्दै दुवै पक्षका प्रस्ताव र सर्तहरूमा सहमति खोज्ने प्रयास गरिरहेको छ।
वार्ताका मुख्य विषयमा इरानको आणविक कार्यक्रम, अमेरिकी प्रतिबन्ध, इरानी बन्दरगाहमाथिको अमेरिकी नौसैनिक नाकाबन्दी र रणनीतिक महत्त्वको होर्मुज जलडमरूमध्य पुनः सञ्चालन गर्ने विषय रहेका छन्। इरानले वार्ताका लागि आफ्ना सात सर्त अघि सारेको बताइएको छ भने अमेरिकाले ती सर्तलाई अव्यावहारिक भन्दै आएको छ। त्यसैले पछिल्लो कूटनीतिक प्रगतिले तत्काल युद्ध अन्त्य हुने सुनिश्चितता भने दिएको छैन।
