सशस्त्र विद्रोहीले पश्चिमी युगान्डाको एउटा विद्यालयमा आक्रमण गर्दा कम्तीमा ४१ जनाको ज्यान गएको छ। मृत्यु हुनेहरूमा अधिकांश विद्यार्थी रहेकाछन् । ८ जना सख्त घाइते छन् भने ६ जनालाई आक्रमणकारीहरूले अपहरण गरेको युगान्डाका अधिकारीहरूले बताएका छन्।
केहीलाई चक्कुले हानेर मारिएको थियो भने अरूलाई उनीहरूको छात्रावासमा आगो लगाएर जिउँदै जलाइएको समाचार सिएनएनले जनाएको छ ।
युगान्डाको सेनाका अनुसार आइएसआईएससँग सम्बन्धित एलाइड डेमोक्रेटिक फोर्स (एडीएफ) विद्रोही समूहका करिब २० सदस्यले शुक्रबार राती लुबिरिरा माध्यमिक विद्यालयमा आक्रमण गरेका थिए। आक्रमणका बेला विद्यालयमा ६२ जना रहेको जनाइएको छ ।