तीतोपाटी – भारतकी हरनाज सन्धुले यस वर्षको मिस युनिभर्स उपाधि जितेकी छन् । सोमबार इजरायलमा आयोजित प्रतियोगितको फाइनलमा पाराग्वे र दक्षिण अफ्रिकाका प्रतियोगीहरूलाइ हराएर २१ वर्षीया पञ्जावकी मोडेल सन्धुले मिस युनिभर्सको ताज जितेकी हुन् ।
मिस युनिभर्सको यस प्रतियोगितमा भारतले २१ वर्षपछि फेरि यो उपाधि जितेको हो । यसअघि सन् २००० मा भारतकी लारा दत्तले मिस युनिभर्सको उपाधि जितेकी थिइन् । ८० देशका प्रतियोगीहरू सहभागी भएको यस पटकको मिस युनिभर्स प्रतियोगिताको फाइनलमा १६ जना उत्कृष्ट सुन्दरीहरू स्पर्धामा थिए ।
इजरायलको इलियटमा आयोजित प्रतियोगितामा मेक्सिकोकी पूर्व मिस युनिभर्स एन्ड्रिया मेजाले सन्धूलाई ताज पहिराइदिएकी थिइन् । त्यस्तै पाराग्वेकी नादिया फेरेइराले फर्स्ट रनरअपको उपाधि जितिन् भने दक्षिण अफ्रिकाकी लालेला स्वानले सेकेन्ड रनरअपको उपाधि जितिन् ।
प्रतियोगिताको ७० वर्षको इतिहासमा पहिलो पटक बहराइनबाट मनार नदीम देयानीले ताजका लागि प्रतिस्पर्धा गरेकी थिइन् तर मध्यपूर्वका कुनै पनि सुन्दरी उत्कृष्ट १६मा पर्न सफल भएनन् ।
