इन्डोनेसियाको राजधानी जाकार्तानजिकै रहेको एउटा कारागारमा भएको आगलागीमा परी कम्तीमा ४१ कैदीको मृत्यु भएको छ । आगलागीमा परी अन्य ८० जना घाइते भएको सरकारी अधिकारीहरुले जानकारी दिएका छन् । उक्त जेलमा दुइ जना विदेशी कैदी सहित १२२ जना रहेको र रातीको समयमा सबै सुतीरहेको समयमा आगलागी भएकोले ठुलो संख्यामा हताहत भएको बीबीसीले जनाएको छ ।
घाइते सबैलाई अस्पताल लगिएको र ती मध्ये ८ जनाको अवस्था गम्भीर रहेको जनाइएको छ । स्थानीय समय अनुसार बिहान १ः४५ बजे आगलागी भएको थियो । करिब १ घण्टापछि मात्रै आगो निभाउन सम्भव भएको थियो । आगलागीमा परेर विदेशी दुइ कैदीको पनि ज्यान गएको छ । उनीहरू एकजना पोर्चुगलका र एक जना दक्षिण अफ्रिकाका थिए । उक्त कारागारमा थुनामा रहेका कैदीहरुमध्ये धेरै जसो लागूऔषधमा संलग्नहरू रहेको जनाइएको छ ।
बिजुली सर्ट भएर आगलागी भएको अनुमान गरिएको जाकार्ता प्रहरी प्रवक्ता युस्री युनुसले जानकारी दिएका छन् । इन्डोनेसियाको कानून र मानव अधिकार मन्त्रालयका जेल विभागकी प्रवक्ता रिका अप्रियन्तीले भने ४० कैदी राख्नको लागी डिजाइन गरिएको भीडभाडमा १२२ जना बसिरहेका बताएकी छन् ।