प्रतिपक्षी नेपाली कांग्रेसका सांसद गगनकुमार थापाले वैदेशिक रोजगारीमा जाने कामदारबारे सरकार मौन रहेको आरोप लगाएका छन्। सोमबार प्रतिनिधिसभा बैठकको शून्य समयमा बोल्दै नेता थापाले कामदारबारे सरकारले वेवास्ता गरेको भन्दै पीडितहरुको रोजगारीको सुनिश्चितता गर्न सरकारको ध्यानाकर्षण गराए।
उनले भाषा तथा सीप उत्तिर्ण गरेर पनि रोजगारीमा जान नपाएर मजदुरीहरु महिनौंदेखि काठमाडौंमा अलपत्र परेको बताए। ‘सरकारी तथ्यांकले भन्छ वैदेशिक रोजगारीमा रहेकाले लाखौंले रोजगारी गुमाएका छन्। जुन नेपाल फर्किएका छन्, फर्केर जान पाएका छैनन्। यिनीहरुको पुनरस्थापनाको बारेमा यो चमत्कारी सरकारले न केही सोच्छ न केही गर्छ,’उनले भने।
दक्षिण कोरियाको भाषा तथा सीप परीक्षा उत्तिर्ण गरेका करिब १० हजार ५ र प्रतिवद्ध कामदार करिब २ हजार महिनौंदेखि काठमाडौंमा अलपत्र उनको भनाइ छ। यिनीहरुको बारेमा लगातार सरकारले वेवास्ता गरेको भन्दै सांसद थापाले भने,’ फिलिपिन्स, म्यान्मार श्रीलंकालगायतका देशकले आफ्ना नागरिकलाई गरेजस्तो पहल कदमी गरिदिएको भए साहेद यिनीहरुले कोरिया जान पाइसकेका हुन्थे होला।’
भाषा तथा सीप परीक्षा उत्तिर्ण गरेकाहरुका लागि सम्बन्धित मन्त्रालयले ठोस काम गरेर सदनलाई जानकारी गराउनका उनले सरकारको ध्यानाकर्षण गराए। कोभिडको प्रवाहले देशभित्रका उद्योग र पर्यटन क्षेत्रमा लाखौं नेपालीले रोजगारी गुमाएको उनले बताए।
-अन्नपूर्णपोष्टबाट
