तीतोपाटी – नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेकपा (एमाले) वरिष्ठ नेता माधवकुमार नेपाल र झलनाथ खनालसँग भेटवार्ता गरेका छन् ।
आइतबार सुरु भएको माओवादी केन्द्रको केन्द्रीय कमिटी बैठक सकिए लगत्तै नेपाल र खनालसँग छलफलका लागि प्रचण्ड कोटेश्वर पुगेका हुन् । सर्वोच्च अदालतले नेपाल कम्युनिस्ट पार्टी (नेकपा) विवादमा निर्णय गर्दा ऋषि कट्टेलको नेकपालाई आधिकारिकता दिएपछि नेता नेपाल र खनाल एमालेमा फर्किएका छन् ।
नेपाल र खनाल एमालेमा फर्किए पनि पार्टी अध्यक्ष एवम् प्रधानमन्त्री केपी ओलीले एकलौटी निर्णय गरेपछि यो समूह असन्तुष्ट छ ।
नेकपा खारेज भएपछि माओवादी र एमाले ब्यूँतिएका हुन् । पार्टी ब्यूँतिएपछि माओवादी केन्द्रले राजनीतिक गतिविधि अगाडि बढाए पनि ओलीले एकलौटी निर्णय गर्दा खनाल र नेपाल तनावमा छन् ।
प्रचण्ड निकट स्रोतका अनुसार नेतात्रयको भेटमा पछिल्लो राजनीतिक घटनाक्रम र नयाँ सत्ता समीकरणको विषयमा छलफल भएको छ ।
