तितोपाटी – खोलाले बगाएर शनिबार एकै परिवारका ४ जनाको मृत्यु भएको छ । कालिकोट जिल्लाको नरहरिनाथ गाउँपालिका–७ स्थित दुदुली खोलाले बगाएर आमा र ३ छोराछोरीको मृत्यु भएको प्रहरीले जनाएको छ । मृत्यु हुनेमा चारैजना अछाम, पञ्चदेवलका हुन् ।
प्रहरीका अनुसार खोलाले बगाएर मृत्यु हुनेमा अछाम पञ्चदेवल विनायक नगरपालिका– ९ बस्ने ३३ वर्षीया देवा बोहरा, उनकी छोरी १४ वर्षीया विपना, एक वर्षीया छोरी आकृति र सात वर्षीय छोरा हेमन्त छन् ।
अछाम र कालिकोटको सीमा क्षेत्रमा पर्ने नरहरिनाथ गाउँपालिका स्थित उक्त खोला तर्ने क्रममा उनीहरूको बगेर मृत्यु भएको प्रहरीले जनाएको छ । लगातारको वर्षाका कारण खोलामा बाढी आएको र तर्ने क्रममा उनीहरूको बगेर मृत्यु भएको हो ।
