तितोपाटी- कोरोना भाइरसका कारण विदेशमा अलपत्र परेका नेपाली कामदार उद्धार गर्ने कार्य जारी छ । बुधबार मात्र खाडीका देश र मलेसियाबाट १० उडानमार्फत् नेपाली स्वदेश फर्कंदै छन् ।
आज कतारबाट १ सय ५४ जना नेपाली बिहान काठमाडौं आइपुगेको त्रिभुवन अन्तर्राष्ट्रिय विमानस्थलले जनाएको छ ।
साथै, कतारबाट नेपाल एअरलाइन्सको चार्टर्ड उडानमार्फत् ६ महिला र १ सय ४८ पुरुष आज स्वदेश आएका छन् । जहाजले कतारमा ज्यान गुमाएका १ नेपालीको शव पनि ल्याएको छ ।
बुधबार हिमालय एअरलाइन्सको अर्को चार्टर्ड उडानमार्फत् पनि कतारबाट नेपाली ल्याउने कार्यतालिका रहेको विमानस्थलले जानकारी दिएको छ ।
त्यस्तै, यूएईको दुबईबाट नेपाल एअरलाइन्स र अबुधाबीबाट हिमालय एअरलाइन्सले नेपाली लिएर आउने छन् भने दुबईबाट फ्लाई दुबईले पनि नेपाली लिएर आउँदैछ ।
आजै कुवेतले आममाफीमा सहभागी नेपालीलाई जजिरा एअरको २ उडानमार्फत् नेपालीलाई स्वदेश पठाउँदैछ ।
साउदीको रियाद र दमामबाट हिमालय र नेपाल एअरलाइन्सको चार्टर्ड उडानमार्फत् पनि नेपाली स्वदेश फर्कंदै छन् ।
मलेसियाको क्लालाम्पुरबाट मलेसियन एअरलाइन्स पनि आज नेपाल आउँदैछ । आज साउदीबाट पनि २ उडानमार्फत् नेपाली स्वदेश फर्कंदै छन् । बुधबार नै नेपाल एअरलाइन्सका जहाज नेपाली लिन कुवेत र साउदीको जेद्दा जाँदैछन् ।
