भारतको दिल्लीमा सामूहिक बलात्कार तथा हत्या मुद्दामा दोषी ठहर गरिएका चार जनालाई मृत्युदण्ड दिइएको छ । दिल्लीस्थित तिहाड जेलमा उनीहरुलाई शुक्रबार बिहान ५:३० मा झुन्ड्याएर मृत्यु दण्ड दिइएको हो ।
निर्भया बलात्कार घटनाका दोषीहरु विनय शर्मा, अक्षयकुमार सिंह, मुकेश सिंह र पवन गुप्ता रहेका छन् ।
सन् २०१२ मा २३ वर्षीया मेडिकल विद्यार्थी निर्भयाको बसभित्रै सामूहिक बलात्कारपछि हत्या भएको थियो । घटनामा ६ जनालाई अदालतले दोषी ठहर गरेको थियो । तीमध्ये एकजनाले तिहाड जेलमै आत्महत्या गरेका थिए भने अर्का एकलाई बालिग नभएको भन्दै सुधार गृहमा पठाइएको थियो ।
घटनापछि भारतभर प्रदर्शन भएका थिए । उनीहरुलाई फाँसी दिएपछि आफूहरुले न्याय पाएको निर्भयाका बाबुआमाले बताएका छन् ।
-नयाँपत्रिकाडेलिबाट
