तितोपाटी- वैदेशिक रोजगार व्यवसायीले रोजगारीका लागि विदेश जानेहरुको उडान आजदेखि रोकेका छन् । नेपाल वैदेशिक रोजगार व्यवसायी संघ(नाफिया)ले गत जेठ ३ गते आयोजना गरेको बृहत व्यवसायी भेलाले ६ बुँदे माग अगाडी सार्दै आफ्ना माग पुरा नभए एक हप्ताका लागि जेठ १७ देखि उडान रोक्ने निर्णय गरेको थियो ।
संघका कार्यवाहक अध्यक्ष रामप्रसाद भन्तनाले शुक्रवार देखि एक साताका लागि कुनै पनि व्यवसायीले आफ्नो कम्पनी मार्फत रोजगारीका लागि जाने व्यक्तिको टिकट नकाटेको बताए । उनले संघका सदस्यहरुलाई माग पुरा नभएका कारण टिकट नकाट्ना जानकारी गराइएको बताए ।
व्यवसायीले टिकट नकाटेपछि रोजगारीका लागि विदेशिनेहरु जेठ २३ गतेसम्म विदेश जान नपाउने अवस्था सिर्जना भएको छ ।
