तितोपाटी – न्युयोर्क सिनेटबाट दुई नेपाली पत्रकार सम्मानित भएका छन् । अमेरिकाको न्युजर्सी र न्युयोर्क निवासी पत्रकारहरु प्रदीप परियार थापा र किशोर पन्थी न्युयोर्क सिनेटबाट सम्मानित भएका हुन् ।
सम्मानित थापा र पन्थीलाई न्युयोर्कको बु्रकलिनमा आयोजित एक कार्यक्रममा न्युयोर्क सिनेटका तर्फबाट सिनेटर सिम्चा फेल्डरबाट हस्ताक्षरित सम्मानपत्र अमेरिकी प्रतिनिधिसभाकी केन्द्रीय सांसद इभेट क्लार्कको उपस्थीतिमा प्रदान गरियो ।
इभेट क्लार्क अमेरिकी केन्द्रीय संसदमा डेमोक्रेटिक पार्टीबाट प्रतिनिधिसभाकी सदस्य हुन् । उनले न्युयोर्कको नवौं डिस्ट्रिक्टको प्रतिनिधित्व गर्छिन् । सन् २००७ देखि १३ सम्म न्युयोर्कको डिस्ट्रिक्ट ११ बाट प्रतिनिधिसभा सदस्य रहेकी उनी सन् २०१३ देखि हालसम्म डिस्ट्रिक्ट ९ बाट प्रतिनिधिसभा सदस्य छिन् ।
उनी गत निर्वाचनमा छैठौंपटक प्रतिनिधिसभामा निर्वाचित भएकी हुन् । सिम्चा फेल्डर न्युयोर्कको स्टेट सिनेटमा डेमोक्रेटिक सांसद हुन् । उनले १७ औं डिस्ट्रिक्टको प्रतिनिधित्व गर्छन् ।
पत्रकार थापा र पन्थीलाई अमेरिकामा पत्रकारितामार्फत गरेको योगदानको कदर गर्दै सम्मान गरिएको हो । पत्रकार थापा हाल युएसनेपाल अनलाइनका प्रधानसम्पादक रहेका छन् भने पन्थी खसोखास म्यागाजिनका प्रधानसम्पादक हुन् । उनीहरुलाई यस अगाडि न्युयोर्क सिटी र जर्सीसिटीको सिटी काउन्सिलबाट समेत सम्मान गरिएको थियो ।
