तितोपाटी – मलामी बोकेर फर्किरहेको ट्याक्टर दुर्घटना हुँदा कञ्चनपुरको बेदकोट नगरपालिका- ८ मा दुईजनाको मृत्यु भएको छ भने दर्जन बढी घाइते भएका छन्। चारजनाको अवस्था गम्भीर रहेको प्रहरी बताएको छ।
अाज बिहान महाकाली नदीबाट मलामी ल्याएर फर्किरहेको से १ त ५४२२ नम्बरको ट्याक्टर पूर्वपश्चिम राजमार्गअन्र्तगत बेदकोट नगरपालिका ८ को कान्लापुल नजिकै दुर्घटना भएको हो । मृत्यु हुनेमा बेदकोट नगरपालिका- ५ बस्ने ३२ वर्षीय प्रेमसिंह धानुक र बेदकोट ४ बस्ने ८५ वर्षीय राजु नागरि रहेको जिल्ला प्रहरी कार्यालयका प्रहरी प्रवक्ता डीएसपी कृष्णराज ओझाले जानकारी दिए।
डीएसपी ओझाका अनुसार दुर्घटनामा परी ४ जना गम्भीर छन्। घाइतेमध्ये ३ जनालाई थप उपचारका लागि भारत रिफर गरिएको छ भने एकजनालाई धनगढी रिफर गरिएको छ। बेदकोट नगरपालिका- ४ बस्ने ४५ वर्षीय आनसिंह धानुक, प्रकाश जोशी र बेदकोट ४ बस्ने २५ वर्षीय दिपेश धानुकलाई भारत र १६ वर्षीय दिलीप भण्डारीलाई सेती अञ्चल अस्पताल धनगढी रिफर गरिएको प्रहरीले जनाएको छ।
अन्य घाइते सामान्य रहेको र उनीहरुको महाकाली अञ्चल अस्पतालमा उपचार भइरहेको प्रहरीको भनाई छ। मलामीबाट फर्किरहेको ट्याक्टरलाई म १ च ३११ नम्बरको जीपले ओभरट्याक गरेपछि ठोक्किएर दुर्घटना भएको प्रहरीले जनाएको छ । प्रहरीले सवारी साधन र चालकलाई नियन्त्रणमा लिइएको जनाएको छ।
