तेहरान । अमेरिका र इरानबीच युद्ध अन्त्य गर्ने कूटनीतिक प्रयास जारी रहेकै बेला इरानको क्यूशम टापुमा दुईवटा क्षेप्यास्त्र खसेको खबर सार्वजनिक भएको छ। इरानको अर्धसरकारी समाचार संस्था तस्निमका अनुसार शनिबार बिहान प्रारम्भिक विवरणमा दुईवटा क्षेप्यास्त्र टापुको सुजा क्षेत्रमा खसेको जनाइएको छ। घटनाबाट भएको क्षति र मानवीय असरबारे भने तत्काल आधिकारिक विवरण सार्वजनिक भएको थिएन।
यसैबीच अमेरिकी राष्ट्रपति डोनाल्ड ट्रम्पले क्यूशम टापुमा अमेरिकी सेनाले सीमित सैन्य हमला गरेको पुष्टि गरेका छन्। उनले इरानले निर्माण गरेको हवाई प्रतिरक्षा प्रणालीलाई लक्षित गरी गरिएको कारबाहीलाई सामान्य प्रकृतिको हमला भनेका छन्। यसअघि इरानी सञ्चारमाध्यमले अमेरिकी एमक्यू–९ ड्रोन खसालिएको दाबी गरेका थिए। तर त्यसबारे अमेरिकी पक्षबाट तत्काल पुष्टि भएको थिएन।
यता कतारका प्रधानमन्त्री तथा विदेशमन्त्री शेख मोहम्मद बिन अब्दुलरहमान अल थानीले अमेरिकी मध्यावधि निर्वाचनपछि पनि वासिङ्टन इरानसँग सम्झौता गर्न इच्छुक रहेको बताएका छन्। अलजजिरासँगको अन्तर्वार्तामा उनले अमेरिका र इरानबीच सहमति खोज्ने प्रयास जारी रहेको र पछिल्ला दिनमा उल्लेखनीय प्रगति भएको बताएका हुन्। उनले पूर्ण रूपमा निर्दोष सम्झौताको प्रतीक्षा गर्नुभन्दा दुवै पक्षले स्वीकार गर्न सक्ने व्यावहारिक सहमति गर्नुपर्नेमा जोड दिएका छन्।
कतारले अमेरिका र इरानबीच मध्यस्थताको प्रयास जारी राखेको छ। कतारी प्रधानमन्त्रीका अनुसार वार्ता केही सुस्त भए पनि रोकिएको छैन। क्षेत्रीय तनाव नियन्त्रणबाहिर जान नदिन कूटनीतिक संवादलाई निरन्तरता दिनुपर्ने उनको भनाइ छ। यसले सैन्य तनावका बीच पनि वार्ताको ढोका पूर्ण रूपमा बन्द नभएको संकेत गरेको छ।
तर क्यूशम टापुमा भएको अमेरिकी हमलाको पुष्टि र क्षेप्यास्त्र खसेको खबरले युद्ध पुनः चर्किन सक्ने चिन्ता बढाएको छ। एकातिर वासिङ्टन सम्झौताको सम्भावना देखाइरहेको छ भने अर्कोतिर सैन्य कारबाही पनि जारी छ। अब अमेरिका र इरानबीचको वार्ताले तनाव घटाउने बाटो खोल्छ वा थप सैन्य टकरावतर्फ परिस्थिति धकेलिन्छ भन्ने विषय क्षेत्रीय सुरक्षाका लागि निर्णायक बन्ने देखिएको छ।
