रुस र युक्रेनका आपतकालीन चेतावनी प्रणालीमा साइबर हमला भएपछि दुवै देशमा झुट्टा सूचना फैलिएको छ।
युक्रेनमा हवाई आक्रमण, विकिरण र रासायनिक हमलाको झुट्टा चेतावनी जारी भएपछि सर्वसाधारणमा केही समय त्रास फैलिएको थियो। युक्रेनी अधिकारीहरूले एक घण्टाभित्र ती सूचना गलत भएको स्पष्ट गर्दै नागरिकलाई नआत्तिन आग्रह गरेका छन्।
केही घण्टापछि रुसले पनि आफ्नो आपतकालीन सूचना एपमा ठूलो साइबर हमला भएको जनाएको छ। हमलापछि केही प्रयोगकर्ताले रुसमाथि परमाणु आक्रमण भएको भन्दै झुट्टा सन्देश प्राप्त गरेका थिए। यद्यपि रूसी अधिकारीहरूले मुख्य चेतावनी प्रणाली भने सामान्य रूपमा सञ्चालनमा रहेको बताएका छन्।
यो घटना युक्रेनको खेरसन क्षेत्रमा लागू गरिएको स्थानीय युद्धविराम सकिनै लाग्दा भएको हो। विश्लेषकहरूका अनुसार युद्धमा साइबर हमला अब महत्वपूर्ण हतियार बन्दै गएको छ।
यसैबीच, रुस र युक्रेनले एकअर्काको ऊर्जा पूर्वाधारमाथि ड्रोन आक्रमण पनि जारी राखेका छन्। दुवै पक्षका आक्रमणका कारण ऊर्जा आपूर्ति प्रभावित भएको बताइएको छ।
विशेषज्ञहरूले आपतकालीन सूचना प्रणालीमा भएको यस्तो ह्याकले वास्तविक संकटका बेला नागरिकको विश्वास कमजोर बनाउन सक्ने चेतावनी दिएका छन्।
