केन्याका धार्मिक नेता पॉल म्याकेन्जीलाई १९० बालबालिकासहित १९१ जनाको मृत्यु गराएको आरोपमा अदालतले २०० वर्षको जेल सजाय सुनाएको छ।
म्याकेन्जीले आफ्ना अनुयायीहरूलाई संसार चाँडै अन्त्य हुने भन्दै स्वर्ग पुग्नका लागि लामो उपवास बस्न प्रेरित गरेका थिए। उनका अनुयायीहरू शाकाहोला जंगलमा बस्न गएका थिए, जहाँ धेरै मानिसको भोकमरीका कारण मृत्यु भएको थियो।
अदालतका अनुसार अधिकांश पीडित बालबालिका थिए। धेरैको मृत्यु खाना नपाएर भएको थियो भने केही बालबालिकाको घाँटी थिचेर, निसास्सिएर वा कुटपिटका कारण ज्यान गएको थियो।
अनुसन्धानका क्रममा शाकाहोला क्षेत्रबाट ४०० भन्दा बढी शव फेला परिसकेका छन्। पीडित परिवारहरूले सजायलाई न्यायको सुरुआत माने पनि आफ्ना प्रियजन गुमाएको पीडा कुनै सजायले कम गर्न नसक्ने बताएका छन्।
