अमेरिकी शान्ति प्रयासका क्रममा तीन दिन रोकिएको रूसको हवाई आक्रमण पुनः सुरु भएपछि मंगलबार बिहान युक्रेनको राजधानी किभमा शक्तिशाली विस्फोटहरू भएका छन्। अमेरिकी राष्ट्रपति डोनाल्ड ट्रम्पका विशेष दूत स्टिभ विटकफ र जारेड कुशनरले रूस र युक्रेनमा वार्ता गरेपछि किभमाथिको आक्रमण पुनः सुरु भएको हो।
रुसले तीन दिनसम्म किभमाथि आक्रमण नगर्ने घोषणा गरेको थियो। उक्त अस्थायी रोक अमेरिकी दूतहरूको मस्को र किभ भ्रमणसँग जोडिएको थियो। उनीहरूले रुसी राष्ट्रपति भ्लादिमिर पुटिन र युक्रेनी राष्ट्रपति भोलोदिमिर जेलेन्स्कीसँग युद्ध अन्त्य गर्ने सम्भावित उपायबारे छलफल गरेका थिए।
तर वार्ता सकिएलगत्तै किभमा पुनः ठूलो हवाई हमला भएको छ। युक्रेनी अधिकारीहरूका अनुसार रुसी सेनाले ब्यालिस्टिक मिसाइल र जेटबाट चल्ने ड्रोन प्रयोग गरेको थियो। विस्फोटपछि राजधानीका विभिन्न क्षेत्रमा आगलागी र भवनमा क्षति पुगेको छ।
किभका मेयर भिताली क्लित्स्कोका अनुसार प्रारम्भिक विवरणमा कम्तीमा दुई जनाको मृत्यु र १० जना घाइते भएका छन्। आवासीय भवनसहित विभिन्न नागरिक संरचनामा क्षति पुगेको र उद्धार टोलीले भवनभित्र फसेका मानिसहरूलाई बाहिर निकालेको बताइएको छ।
युक्रेनी अधिकारीहरूले राजधानीसहित आसपासका बोरिस्पिल र फास्टिभ क्षेत्रमा समेत आक्रमण भएको बताएका छन्। हवाई आक्रमणको चेतावनी जारी गर्दै किभ प्रशासनले सर्वसाधारणलाई सुरक्षित स्थान तथा आश्रयस्थलमा जान आग्रह गरेको थियो।
अमेरिकी शान्ति प्रयासका क्रममा भएको तीनदिने रोकले रूस र युक्रेनबीच पुनः प्रत्यक्ष वार्ता सुरु हुने आशा बढाएको थियो। अमेरिकी दूत विटकफले वार्तापछि दुवै पक्षबीच थप छलफलका लागि आवश्यक आधार बनेको संकेत गरेका थिए। क्रेमलिनले पनि अमेरिका, रूस र युक्रेनबीचको त्रिपक्षीय वार्ता पुनः सुरु गर्ने सम्भावनालाई अस्वीकार गरेको छैन।
तर किभमाथिको पुनः आक्रमणले कूटनीतिक प्रयास र युद्धभूमिको वास्तविकताबीच रहेको ठूलो दूरीलाई उजागर गरेको छ। वार्ता अघि बढिरहँदा पनि दुवै पक्षले सैन्य दबाब कायम राखेका छन्।
युक्रेनले पछिल्लो आक्रमणपछि आफ्नो हवाई प्रतिरक्षा प्रणालीका लागि थप मिसाइल र उपकरण आवश्यक रहेको जनाएको छ। लामो समयदेखि जारी रुसी ड्रोन र मिसाइल आक्रमणका कारण युक्रेनको एयर डिफेन्स क्षमतामाथि दबाब बढिरहेको बताइएको छ।
उता रूसले आफ्ना आक्रमणहरूलाई सैन्य तथा लजिस्टिक पूर्वाधार लक्षित भएको दाबी गर्दै आएको छ। युक्रेनले भने राजधानीमा भएका आक्रमणबाट आवासीय तथा अन्य नागरिक संरचनामा क्षति पुगेको जनाएको छ।
पछिल्लो घटनाक्रमसँगै अमेरिकी शान्ति पहल सफल हुन्छ कि युद्ध पुनः अझ तीव्र बन्छ भन्ने प्रश्न थप गम्भीर बनेको छ। तीनदिने आंशिक रोकले युद्ध रोक्न सम्भव रहेको संकेत दिए पनि त्यसलाई स्थायी युद्धविराममा रूपान्तरण गर्न अझै कठिन वार्ता आवश्यक देखिएको छ।
