फ्रान्सभरि बढ्दो जीवनयापन खर्च, महँगी, इन्धन मूल्य वृद्धि तथा सार्वजनिक सेवाप्रति असन्तुष्टिका कारण शनिबार आयोजित तेस्रो चरणको राष्ट्रव्यापी प्रदर्शनमा करिब ३ लाख २० हजार मानिस सहभागी भएको फ्रान्सको आन्तरिक मन्त्रालयले जनाएको छ। आयोजकहरूले भने सहभागी संख्या झण्डै ५ लाख पुगेको दाबी गरेका छन्।
दिनभर अधिकांश प्रदर्शन शान्तिपूर्ण रहे पनि साँझतिर पेरिस, लियोन, टुलुज र मार्सेई लगायतका शहरहरूमा केही स्थानमा प्रदर्शनकारी र सुरक्षाकर्मीबीच झडप भएको थियो। प्रहरीले भीड नियन्त्रण गर्न केही स्थानमा अश्रुग्यास प्रयोग गरेको जनाएको छ।
यी प्रदर्शनहरू लगातार तेस्रो साता जारी छन्। प्रदर्शनकारीहरूले बढ्दो महँगी, शिक्षा क्षेत्रका समस्या, सार्वजनिक सेवाको कमजोर अवस्था तथा राष्ट्रपति इमानुएल म्याक्रों सरकारको आर्थिक नीतिप्रति असन्तुष्टि व्यक्त गरेका छन्। विद्यार्थी, ट्रेड युनियन तथा पुनः सक्रिय हुँदै गएको यलो भेस्ट आन्दोलन यस आन्दोलनमा सहभागी छन्।
फ्रान्सका गृहमन्त्री लरेन्ट नुनेज ले अधिकांश शहरहरूमा सार्वजनिक सुरक्षा कायम राख्न सफल भएको दाबी गर्दै सम्भावित हिंसात्मक गतिविधिविरुद्ध कडा कारबाही गरिने चेतावनी दिएका छन्।
यस आन्दोलनको प्रभाव फ्रान्स बाहिर पनि देखिएको छ। जर्मनी र इटालीका विभिन्न शहरहरूमा पनि युवा नेतृत्वमा समान प्रकृतिका प्रदर्शनहरू भएका छन्।
आर्थिक असर पनि उल्लेखनीय बन्दै गएको छ। फ्रान्सको वाणिज्य चेम्बरका अनुसार तीन साताको अशान्तिका कारण खुद्रा व्यापारीहरूले १ अर्ब युरोभन्दा बढी क्षति बेहोरेका छन्। केही अनुमानले कुल क्षति यसभन्दा दोब्बरसम्म पुगेको बताउँछन्।
