भोटेकोसी बाढी र पहिरोका कारण पृथ्वी राजमार्ग अवरुद्ध भएपछि प्रहरीले काठमाडौं र हेटौँडा बीच चल्ने सवारीसाधनका लागि नयाँ रुट लागू गरेको छ।
प्रहरीका अनुसार १० चक्कासम्मका मालवाहक र ठूला यात्रुवाहक सवारीसाधन काठमाडौं जाँदा त्रिभुवन राजपथ र फर्किंदा कान्ति राजमार्ग प्रयोग गर्नुपर्नेछ। १४ सिटभन्दा कम क्षमताका साना सवारीसाधनका लागि पनि छुट्टै मार्ग तोकिएको छ।
कान्ति राजमार्ग प्रयोग गर्ने सवारीसाधनले साँझ ६ बज्नुअघि ठिङ्गन चेकपोस्ट पार गरिसक्नुपर्ने व्यवस्था गरिएको छ। प्रहरीले अत्यावश्यक अवस्थामा मात्र यात्रा गर्न, ओभरटेक नगर्न र ट्राफिक प्रहरीको निर्देशन पालना गर्न आग्रह गरेको छ।
बाढी र पहिरोका कारण धादिङको कृष्णभिर र परेवाभिर क्षेत्रमा सडक पूर्ण रूपमा अवरुद्ध रहेको छ।
