मालीमा उग्रवादी हमला, ४८ नागरिकको ज्यान गयो

पश्चिम अफ्रिकी देश माली को पूर्वी मेनाका (Ménaka) क्षेत्रमा इस्लामिक स्टेट (आईएस) सँग सम्बद्ध उग्रवादी समूहले गरेको भीषण आक्रमणमा कम्तीमा ४८ जना सर्वसाधारणको मृत्यु भएको छ। स्थानीय अधिकारीहरूका अनुसार महिला, बालबालिका र वृद्धवृद्धासमेत आक्रमणका पीडित बनेका छन्।

स्थानीय स्रोतहरूका अनुसार उग्रवादीहरू आइतबार रातिदेखि सोमबार बिहानसम्म मोटरसाइकलमा विभिन्न गाउँमा पुगेका थिए। उनीहरूले बस्तीमा अन्धाधुन्ध गोलीबारी गर्दै नागरिकलाई लक्षित आक्रमण गरेका थिए, जसका कारण ठूलो मानवीय क्षति भएको बताइएको छ।

आक्रमणपछि सयौँ परिवार घरबार छाड्न बाध्य भएका छन्। धेरै स्थानीय बासिन्दा सुरक्षित स्थानको खोजीमा मेनाका सहर तथा छिमेकी क्षेत्रमा विस्थापित भएका छन्। घटनापछि प्रभावित क्षेत्रमा त्रास फैलिएको छ।

प्रारम्भिक जानकारीअनुसार Islamic State in Sahel Province (ISSP) का लडाकुहरूले स्थानीय बासिन्दामाथि मालीको सेनालाई आफ्ना गतिविधिबारे सूचना दिएको आरोप लगाएका थिए। केही समयअघि सो क्षेत्रमा गरिएको सैन्य कारबाहीको बदला स्वरूप नागरिकमाथि हमला गरिएको हुन सक्ने स्थानीय सुरक्षा स्रोतहरूको अनुमान छ।

सन् २०१२ यता मालीमा उग्रवाद, साम्प्रदायिक हिंसा र विद्रोही गतिविधिका कारण सुरक्षा अवस्था कमजोर बन्दै गएको छ। देशको सैन्य सरकारले विभिन्न सुरक्षा साझेदारसँग मिलेर उग्रवादीविरुद्ध अभियान सञ्चालन गरिरहेको भए पनि ग्रामीण क्षेत्रमा हिंसात्मक घटना रोक्न चुनौती कायम रहेको छ।

हालैको घटनाले साहेल क्षेत्रको सुरक्षासम्बन्धी चिन्ता थप गम्भीर बनाएको छ। अन्तर्राष्ट्रिय समुदायले सर्वसाधारण नागरिकको सुरक्षाको सुनिश्चितता र हिंसा रोक्न प्रभावकारी कदम चाल्न आग्रह गरेको छ।
https://www.washingtonpost.com/world/2026/10/20/mali-attack-menaka-deaths-sahel-tuareg-issp/eba6d9c2-cc98-11f1-ac04-9f58578a68b4_story.html