दक्षिण अमेरिकी देश कोलम्बियाको दक्षिणपश्चिमी नारिनो प्रान्तमा अनुमति नलिई सञ्चालन गरिएको खुला सुनखानी भत्किँदा कम्तीमा १४ जना खानी मजदुरको मृत्यु भएको छ भने सात जना घाइते भएका छन्।
क्षेत्रीय अधिकारीहरूका अनुसार दुर्घटनापछि सञ्चालन गरिएको खोजी तथा उद्धार कार्य सोमबार राति सम्पन्न भएको छ। सान्ता बार्बरा डे इस्कुआन्डे नगरनजिक भएको दुर्घटनामा खानीभित्र रहेका मजदुरहरू माटो र भग्नावशेषमा पुरिएका थिए।
प्रान्तीय सरकारले उक्त घटनाले अनौपचारिक तथा अवैध रूपमा सञ्चालन गरिने खानीहरूको जोखिम पुनः उजागर गरेको जनाएको छ। सरकारी तथ्याङ्कअनुसार पछिल्लो तीन महिनाभित्र मात्रै नारिनोमा दुईवटा खानी दुर्घटना भएका छन्, जसमा हालसम्म २७ जनाले ज्यान गुमाइसकेका छन्।
घना वर्षावनले घेरिएको सान्ता बार्बरा डे इस्कुआन्डे दुर्गम क्षेत्रमा पर्ने भएकाले उद्धार टोलीलाई घटनास्थलसम्म पुग्न कठिनाइ भएको थियो। त्यहाँ पुग्न डुङ्गा वा साना विमानको प्रयोग गर्नुपर्ने अवस्था रहेको बताइएको छ।
नारिनोका गभर्नर लुइस अल्फोन्सो एस्कोबारले दुर्घटनाप्रति गहिरो दुःख व्यक्त गर्दै यसबाट धेरै परिवार प्रत्यक्ष प्रभावित भएको बताएका छन्। उनले पीडित परिवारप्रति समवेदना व्यक्त गर्दै यस्ता घटना रोक्न कडा सुरक्षा उपाय आवश्यक रहेको बताए।
कोलम्बियामा सरकारी स्वीकृतिबिनै सञ्चालन हुने सयौँ साना खानीहरू रहेका छन्। तीमध्ये केही क्षेत्रमा सशस्त्र विद्रोही समूहहरूको प्रभाव रहेको बताइन्छ। विशेषगरी नारिनो क्षेत्रमा सन् २०१६ को शान्ति सम्झौतामा सहभागी हुन अस्वीकार गरेका फार्क (FARC) का पूर्वसदस्यहरूको नेतृत्वमा रहेको ज्याकोबो एरेनास समूहसहित विभिन्न विद्रोही संगठन सक्रिय छन्।
यसैबीच, कोलम्बियाको लोकपाल कार्यालयले प्रभावित क्षेत्रमा राहत तथा मानवीय सहायता पुर्याउने कार्यमा अवरोध नगर्न सशस्त्र समूहहरूलाई आग्रह गरेको छ। कार्यालयले सामाजिक सञ्जालमार्फत जारी गरेको सन्देशमा “सबै प्रयास जीवन बचाउन र आपत्कालीन अवस्थाको सामना गर्न केन्द्रित हुनुपर्छ” भन्ने उल्लेख गरेको छ।
