आईसीसी विश्वकप लिग–२ अन्तर्गत ओमानमा सम्पन्न एकदिवसीय अन्तर्राष्ट्रिय शृंखला खेलेर नेपाली राष्ट्रिय पुरुष क्रिकेट टोली मंगलबार साँझ स्वदेश फर्किएको छ। टोलीले एकदिवसीय अन्तर्राष्ट्रिय (ओडीआई) मान्यता जोगाउन सफल भएको छ ।
टोली त्रिभुवन अन्तर्राष्ट्रिय विमानस्थलमा अवतरण गरेपछि नेपाल क्रिकेट संघ (क्यान) का पदाधिकारी तथा प्रतिनिधिहरूले खेलाडी र प्रशिक्षक टोलीलाई स्वागत गरेका छन्।
ओमानमा सम्पन्न लिग–२ को अन्तिम शृंखलामा नेपालको प्रदर्शन उत्साहजनक रह्यो। नेपालले खेलेका चार खेलमध्ये तीन खेलमा जित हासिल गर्दै उत्कृष्ट नतिजा निकाल्न सफल भयो।
यस शृंखलामा नेपालले आयोजक ओमान र क्यानडा विरुद्ध प्रतिस्पर्धा गरेको थियो। लगातार राम्रो प्रदर्शन गर्दै नेपालले अंकतालिकामा महत्वपूर्ण अंक जोड्न सफल भएको छ।
हालका वर्षहरूमा नेपाली टोलीले अन्तर्राष्ट्रिय क्रिकेटमा उल्लेखनीय सुधार गर्दै आएको छ। ओमान भ्रमणमा पनि ब्याटिङ, बलिङ र फिल्डिङ तीनै पक्षमा सन्तुलित प्रदर्शन गर्दै टोलीले समर्थकको अपेक्षा पूरा गरेको देखिएको छ।
स्वदेश फर्किएपछि खेलाडीहरूले आगामी अन्तर्राष्ट्रिय प्रतियोगिताको तयारीमा ध्यान केन्द्रित गर्ने जनाइएको छ।
