इरानी विदेश मन्त्रालयका प्रवक्ता इस्माइल बकाईले पाकिस्तान, टर्की र साउदी अरबबीच भएको त्रिपक्षीय सुरक्षा सम्झौता इरानविरुद्ध लक्षित नभएको बताएका छन्।
बकाईले भनेका छन्, “हामीलाई लाग्छ, टर्की, पाकिस्तान र साउदी अरबबीच भएको सम्झौता इरानविरुद्ध होइन।”
पाकिस्तान, टर्की र साउदी अरबबीच भएको यस त्रिपक्षीय सुरक्षा सम्झौतालाई ‘मक्का सन्धि’ भनेर चिनिन्छ। सम्झौताअनुसार तीनमध्ये कुनै एक देशमाथि भएको हमला तीनै देशमाथिको हमला मानिनेछ।
बीबीसी फारसीका अनुसार, बकाईले इरानविरुद्ध उक्त सम्झौता प्रयोग हुने चिन्ता गर्नुपर्ने कुनै कारण नरहेको बताएका छन्।
साप्ताहिक पत्रकार सम्मेलनमा उनले क्षेत्रीय मुलुकहरूको सुरक्षा धारणामा परिवर्तन आएको संकेत गर्दै भने, “देशहरू अब अमेरिकाले दिँदै आएको सुरक्षा प्रत्याभूतिमाथि मात्र भर पर्न नसकिने निष्कर्षमा पुगेका छन्।”
होर्मुज जलडमरूमध्यबारे बकाईले भने, नौसैनिक नाकाबन्दी तथा समझदारीका अन्य उल्लंघनहरू जारी रहेसम्म होर्मुजलाई सुरक्षित बनाउने आवश्यक अवस्था सिर्जना भएको छैन।
यसअघि इरानी विदेशमन्त्री अब्बास अराघ्चीले आइतबार अमेरिकाले आफ्ना प्रतिबद्धता उल्लंघन गरिरहेसम्म वार्ता पुनः सुरु गर्न सम्भव नरहेको बताएका थिए।
यता, इरानी विदेश मन्त्रालयका प्रवक्ताले सोमबार अराघ्ची र इरानी संसद्का सभामुख मोहम्मद बाघेर गालिबाफलाई पाकिस्तान भ्रमणको निमन्त्रणा प्राप्त भएको जानकारी दिएका छन्। उनका अनुसार परिस्थितिहरू अनुकूल भएपछि उक्त भ्रमण हुन सक्नेछ।
