इजरायली प्रधानमन्त्री बेन्जामिन नेतन्याहुले आइतबार अमेरिकी राष्ट्रपति डोनाल्ड ट्रम्पको गाजासम्बन्धी १५-बुँदे ‘बोर्ड अफ पीस’ योजना अस्वीकार गर्दै हमास पूर्ण रूपमा निःशस्त्र नभएसम्म इजरायली सेना गाजाबाट फिर्ता नहुने बताएका छन्।
नेतन्याहुले आफू प्रधानमन्त्री रहुन्जेल पश्चिम किनारा र गाजामा प्यालेस्टिनी राज्य स्थापना हुन नदिने अडानसमेत दोहोर्याएका छन्।
ट्रम्पले गत महिना गाजामा जारी युद्ध अन्त्य गर्ने आफ्नो योजनामा महत्वपूर्ण प्रगति भएको दाबी गरेका थिए। उक्त योजनालाई इजरायली सरकार र हमासले गत वर्ष स्वीकार गरेपछि युद्धविराम सुरु भएको थियो। यद्यपि, युद्धविरामपछि पनि इजरायली सेनाले गाजामा सैन्य कारबाही जारी राखेको बताइएको छ।
ट्रम्पका अनुसार हमासले आफ्ना हतियार त्याग्न सहमति जनाएको थियो। तर नेतन्याहुको पछिल्लो अभिव्यक्तिले हमासको पूर्ण निःशस्त्रीकरणलाई इजरायलले गाजाबाट सैन्य रूपमा पछि हट्ने प्रमुख सर्त बनाएको देखिन्छ।
यसैबीच, नेतन्याहुले इरानलाई आणविक हतियार प्राप्त गर्न नदिने प्रतिबद्धता पनि व्यक्त गरेका छन्। उनले अमेरिका तथा अरब राष्ट्रहरूसँगको कूटनीतिक प्रयास जुनसुकै दिशामा अघि बढे पनि इरानलाई आणविक हतियार बनाउन नदिने बताएका छन्।
नेतन्याहुको पछिल्लो अडानले गाजाको युद्ध अन्त्य गर्ने प्रयाससँगै प्यालेस्टिनी राज्यको भविष्य, हमासको निशस्त्रीकरण र इरानको आणविक कार्यक्रम तीनवटै विषय अझ जटिल र विवादित बनेको संकेत गर्छ।
- Kuwait times
